今日，孫柏文謹代表大陸汽車業，向法拉利用隻金手指行個「一指禮」，講句：「多謝，白癡！」（Grazie,stupido！）事緣在上個禮拜，歐盟某高官話大陸有人複製已經絕版嘅法拉利跑車，證據就係，有一幅喺大陸影到嗰部車嘅相。咁呢位高官就揸住幅相，指定動作咁大喊：「翻版啊！大陸翻版啊！」
首先，憑個樣就話人複製你架車，好似有啲唔公平。喺大陸貌似法拉利嘅車，係唔係可以好似真嘅法拉利一樣咁快？因為，如果大陸嗰部車只係貌似法拉利，不過性能上差好多，咁我就要用隻金手指去篤醒呢個歐盟高官。因為呢啲貌似超級跑車，不過「得個樣」嘅車，其實喺花旗國已經流行多年，喺當地叫做「kitcar」，唔信可以去google查吓。咁花旗國都已經做咗咁多年，又唔見歐盟嘈佢？
不過我相信大家一定會問：「點解孫柏文要代表大陸汽車業，向歐盟講多謝呢？歐盟鬧完大陸『翻版』之後，又可以用大把理由抵制國貨喎？」我要多謝歐盟嘅原因，係因為只要歐盟一鬧大陸汽車業翻版，就即刻變成大陸汽車業嘅最佳推銷員。
道理好簡單，如果大陸翻版嘅「法拉利」完全唔似，又唔跑得，法拉利同歐盟點會嘈喧巴閉、張牙舞爪呢？所以法拉利同歐盟都嘈嘅時候，即係話大陸翻版嘅「法拉利」好掂，大家仲唔喺心裏面諗：「嘩！大陸做嘅翻版法拉利，掂到連法拉利同歐盟都鬧喎。如果好似翻版手袋一樣，可以平過真貨9成以上，我都想知道邊度有得買，等我都買番架！仲有，法拉利都鬧得嘅話，做翻版嘅大陸汽車業咪好勁？肯定手工超卓、價錢廉宜，遲早取代歐洲汽車工業，佔世界領先地位啦。」
最值錢公關唔易搵
所以有時鬧人，反而係幫咗佢！其實我哋特區都有個咁嘅例子，有一間公司愈被人鬧，鬧佢嘅人其實係愈幫緊佢。呢間公司，就係當年嘅盈科數碼動力。政府當年用咗啲比興建會議展覽中心苛刻嘅條件，叫盈科數碼動力捱義氣幫特區經濟轉型，叫佢起一間叫做數碼港嘅東西，點知呢啲咁差嘅條件，就遇上一班冇嘢做嘅民粹政客。
呢班政客為咗交功課就做場騷，發起遊行示威，大叫：「特權啊！特權啊！」講真嗰句，大家一定即時心諗：「連神聖嘅民選議員都話佢哋有特權，咁佢哋咪可以用啲咁堅嘅特權去搵好多錢？咁嗰股價容乜易由𠵱家一毛豆零升到20幾蚊？就算股壇長毛話數碼港只係值5毫子1股，如果盈科可以成功用數碼港幫香港經濟轉型，你估唔會有數碼港二、數碼山、數碼島……。所以，數碼港？掃咗先至講！」所以孫柏文成日都話最值錢嘅公關唔可以用正常途徑請番嚟，同埋我都要讚吓當年度數碼港條橋嘅人，可以成功預測或驅使這班神聖嘅議員出嚟投訴話有特權，仲唔勁？
禮拜二凌晨，孫柏文一邊打機一邊睇CNBC，睇到靚女主持人MariaBartiromo喺芝加哥期權交易場，現場訪問聯儲局芝加哥支部阿頭，靚女主持人話：「好多人都話伯南克加完息，不過，周末我同伯南克喺一個社交活動度傾偈，佢話市場誤會咗佢。」女主持人好似先知一樣，傳完「神」嘅話語之後，個市就即刻由升變跌。孫柏文一定要承認我好妒忌呢個女人，我幾時可以好似佢咁，金手指一篤，個市即刻郁。
孫柏文