我阿利揸車出九龍嘅時候，愈嚟愈覺得悶。點解？皆因𠵱家啲收音機節目愈來愈渣，真係冇乜節目啱聽。以前都有大班聽吓，𠵱家啲主持人，又嘈又冇料，搞到我要熄咗副機專心揸車。我架老爺日本車咁慢，成個鐘靜英英，你話悶唔悶？
講開電台，最近審計署嗰份辣着港台嘅審計報告，就夠晒受注目。審計署其實都有唔少我哋呢啲會計佬響入面做。呢類審計報告，商界都做唔少，尤其係近年交易所大力推動企業管治內部監控，好多上市公司都會搵啲會計師樓做番份報告，睇睇公司有乜嘢頭暈身㷫。
雞蛋裏挑埋頭髮內臟
會計佬做得呢類有關營運效率嘅檢視報告，唔使諗，一定係將所有發現無論大細全部高低，寫得愈多愈厚，就證明你有料值租。否則，薄依依幾版紙，又點會值幾廿萬收費？
審計署批評港台嗰啲缺點，例如逾時工作是否無可避免、行車紀錄未有簽名、六次春茗原因又冇記錄在案等等，何止係雞蛋裏挑骨頭，直情係挑埋頭髮內臟。
港台要跟咁多私人公司打交道，用政府僵化嘅方法辦事，死硬。
不過，審計署係按既定程序去做審查，少少唔跟足規矩嘅發現，梗係要咬住唔放。唔好話審計署有政治目的，只不過按程序辦事啫。
不過，老細點用啲報告就係後話。好多上市公司老細睇完份冚棚冷芝麻綠豆嘅內部審計報告，都會掉落廁紙籮居多，表示自己公司冇問題。好似政府咁認真對待，煞有介事，就真係好少見。