華華噚日先講話賓卡生涯大不如前，今日又有一個實例。邊個咁唔好彩？咪中銀和廣北囉！
和總前幾日先喺大會堂做迎賓，事關間行贊助香港管弦樂團，搞咗8場莫札特系列音樂會；噚日又做親善大使，連同法國領事及畫家ClaireBasler，為中銀總行個畫展剪綵。
雖則係自己地頭，唔使左騰右騰，但係和廣北全程齋企冇得坐，仲要俾幾十WATT嘅大光燈射住，企定定答傳媒問題，就算冷氣十足，佢都成頭大汗！之不過，和總辛苦都係抵嘅，事關佢係05年最高薪嘅中資賓卡，年薪有成702.8萬，比前年多咗63%。
講番個畫展，其實係法國5月（FrenchofMay）活動之一，中銀已經第二次做贊助商，今次會有40幅ClaireBasler嘅油畫展出，和總同ClaireBasler一齊賞畫時，問咗對方好多問題，對啲畫好似幾有興趣，大家都有興趣睇？就要去中銀總行睇，平日朝九晚八，周六就朝九午一，展期至月底。