上周掛牌的兩隻新股上海集優（2345）同大連港（2880），昨日繼續炒上，前者大升10.35％，收3.20元，後者亦升5.78％，收4.575元。兩隻新股成交股金額好大，一隻5億銀，一隻7億銀。炒新股炒到咁，實在令小初懷疑係基金未買夠，定係班對沖基金炒過龍博大霧？
其實唔只新股，好多細價股繼續獲芬佬垂青，就算未有盈利都係咁話，好似話轉型去山西搞焦煤的國華（370），剛公布05年全年業績，虧損擴大至1.37億元，而焦煤項目差唔多要到年中先至完成收購，但偏偏有芬佬一直不離不棄。
今年3月，國華以每股0.109元配股，德意志要咗一大批貨，而國華受呢個消息刺激，股價一度炒上0.188元，近期受宏調影響股價回落，德意志不但冇沽貨，按平均價0.162元增持800萬股，唔通真係咁有信心？
國華昨日受業績唔靚消息影響，股價曾低見0.139元，但收報0.146元，只係跌咗2％。
慕容小初