Hea：識鬼你藝術品照瞓！

Hea：識鬼你藝術品照瞓！

知道灣仔香港藝術中心門口天橋底2條柱有小克作品，專登過去昅昅，嘩！乜事呀？藝術品唔係話欣賞唔到，不過無啦啦上演多幕大殺風景的路人甲乙丙食飯記，唔係話睇唔起路人的藝術修養，不過食完飯飯盒都唔清理就不顧而去，唔通垃圾都可以做藝術品？講開又講，原來香港好多天橋底都係藝術品展覽場地，可惜，遇唔上知音人不特止，仲受到漠視……
記者：黃藹瑩
攝影：黃子偉、陳盛臣、周旭文

香港藝術中心：淪為公眾飯堂

最近香港藝術中心搞咗個「公共藝術計劃」，透過公共設施及幾位本地漫畫家的創作，美化中心附近環境兼增加其藝術指數，除何家超作品《星期天的下午》外，中心門口對出2條大柱也分別繪上一男一女漫畫公仔，名堂是《隔着漫畫說愛你》，雖然顏色夠搶，又是本地為人所熟悉的漫畫家小克的作品，但一樣有人無面畀，掂行掂過當2碌柱無到之餘，仲糟蹋埋門口的張智強作品「蛇形綠櫈」《LeisureSlice》，……話說小記某日2:00pm特意走去藝術中心諗住影番張相當支持，點知就親眼目睹3位哥哥仔坐櫈開飯，食完瞓低午睡，走人仲留低飯盒，整到周圍污穢邋遢，唉！

■平日中心門口都是一眾地盤工友「飯堂」，有心欣賞藝術品，請盡量避免午飯時間。

■小克作品《隔着漫畫說愛你》，創作意念是一男一女伸手迎接擁抱，讓行人穿梭2柱之間感受當中的愛。

■擺放位置高人一等，何家超作品《星期天的下午》反而無人走埋去破壞。

■唔該畀啲公德心啦，食完飯留低飯盒就走，離譜。

路人點睇

■Lily：「雖然可能只係匆匆行過，但藝術中心多幾件藝品始終係好事。」

■Elaine：「何家超作品比較顯眼，2條柱就未必睇到，平日經過都無留意。」

■Gigi：「成日都見班地盤佬聚喺度食飯，唔係咁好睇囉，阻住人欣賞啲畫。」

天橋漫畫柱：無人知翻新過

同樣是天橋柱畫，金鐘軒尼斯道警察總部對出行人天橋之上以「灣仔五十景」為主題的50條漫畫柱，就連畀地盤佬圍住食飯的機會都無！話說這50條漫畫柱早在2000年存在，因日曬雨淋出現褪色現象，灣仔市區小工程計劃工作小組遂於去年為50條柱重新着色，還把畫稿射印上鋁板再安裝到石柱上，顏色勁Sharp驟眼睇真係幾得，可惜眼見經過路人無一駐足欣賞，問附近上班族點睇，原來無人睇，佢哋答案一致：「係咩？翻新過咩？點知呀？無留意喎。」這項翻新工程盛惠130萬，看來都是浪費。

■去年才完成翻新工程，到現在還有幾條漫畫柱封包膠紙未拆。

■天橋行人不算多，午飯時間都不見得有太多人走過。

■「灣仔五十景」之一的「駱克道酒吧」。

路人點睇

■Mandy：「知道呢條天橋啲柱有公仔，不過唔知佢翻新過喎。」

■Yoyo：「唔係你話我知，我真係睇唔出佢翻新過。」

3D海洋世界：無厘頭兼勁污穢

好少見政府的天橋底藝術品可以咁有主題，大角嘴港灣豪庭對出天橋底大玩3D海洋世界之餘，仲帶出清晰的保護海洋訊息，雖然有啲九唔搭八，不過都算幾有教育意義。可惜吖，又係無乜人理，理嘅，頂多係小朋友，難為阿陳文佑議員仲高調拉Banner唱通街話畀人知全靠佢先爭取到這個海洋世界，又想問一句：「邊個話要個海洋世界呀？」

■橋底是過馬路位，駐足欣賞的路人不多，又企正地盤旁邊，你都唔會行埋去睇啦，想吸塵咩？

■議員拉Banner彰顯功績，不過想問，無端端整個海洋世界出嚟做乜？

■小朋友最怕這隻海獅，話顏色衰喎。

■真係吸晒塵，有圖為證，自生自滅的海豚超污穢。

■個人認為最靚是這幾隻海馬。

■都話無人理㗎啦，有「死魚」都無人知。

路人點睇

（左）呂太：「都覺得美化到環境嘅，不過就未認真欣賞過，過緊馬路俾細路仔走來走去好危險。」囝囝：「海獅最醜樣。」老實我都咁認為。

油塘地鐵站：雕塑變遊樂場

地鐵公司唔排除乘客搭車都有閒情逸志欣賞藝術品，所以只要一有地方，地鐵站內外都會擺放藝術品供路人欣賞，原意當然好，可惜藝術品《行人‧閒人》放在住戶極多的油塘A出口行人天橋底，藝術品只淪為等人老地方及兒童遊樂場，即使地鐵公司放了一個警告牌，但路人還是視而不見，唔知作者李慧嫻見到會有乜感受？

■煲煙行遠啲啦，話晒都係藝術品呀。

■棟埋鐵牌叫人「尊重這些藝術作品」喎，嘥氣喇。

■嘩……食得好滋味喎，不過唔坐得㗎，妹妹你知唔知？

■好玩過擒鋼架啦，變成一個兒童遊樂場。