輪到滙控（005）領風騷，恒指大升206點，有131點係滙控所貢獻。對恒指最大負貢獻嘅，則係中移動（941），跌0.65元，拖低恒指40點。但並唔係所有國內電訊股都唔得，聯通（762）就急升7.5%，收7.10元。
升得急嘅藍籌C輪，忍吓手，咪高追住。睇番啲冇郁嘅C輪，咁做可以避免承受較大風險。
中移動C輪4451：中移動兩周前見47.50元新高，急得滯，過咗火位，𠵱家逆市回落，可以清涼一吓，喺44元邊邊，再次見底，遲吓又嚟過，趁佢跌，低價買番啲C輪。
主角對象係4451，昨收47.5仙，跌14%。隻輪按公式計，理論跌幅4.6仙，跌夠7.5仙，跌突咗。隻輪8月初到期，溢價2.7%，槓桿率9.4倍（有效6.7倍），引伸波幅33%。
和黃C輪2211：喺今個回合，和黃（013）落後咗，值得趁低撈啲C輪，正路之選係2211。隻輪6月尾夠鐘，輪價30.5仙，溢價1.1%，槓桿率25倍（有效15.2倍），引伸波幅19.6%。
長實C輪4771：長實（001）標青，地產股睇勢重有得去，但最好等長實稍為回軟之時，先至搵C輪上車。靚嘢有4771，數據好過好多隻其他同類輪。其次，4878都唔錯。
章盛