華華噚日收到一紙傳真，話香港小輪明日舉行嘅股東周年大會，主席林高演（圖）病咗未能出席，所以股東會後冇記者會。金融界有邊個唔知林高演係恒地主席李兆基嘅左右手？佢抱恙隨時影響恒地股價；記憶中，林高演未試過失場，十幾年都未請過病假，今次病到連股東會都唔開，唔通好大鑊？
據知情人士講，林高演視網膜鬆離，十幾日前做咗手術，家陣已經康復，但佢聽醫生勸告休息一個月，唔可以睇文件咁操勞，等個膜有時間穩定番。不過，佢鐵定喺5月19日嘅煤氣股東會「復出」見記者。
睇唔到路照返工
好記性嘅讀者應該記得前排恒基發展配股集資，知情人士話，嗰排林生已經覺得隻眼有啲唔妥，以為自己有飛蚊症。林高演一向唔係畏疾忌醫嘅人，但配股咁大件事，點都捱埋先去驗眼，咁搏命，難怪四叔咁信佢，結果驗出係視網膜鬆離，好彩情況未致嚴重，但都要做手術。
不過，咪以為放病假成個月嘅林高演真係喺屋企休養咁疏乎噃，聽講噚日佢都有返工，雖然唔可以睇文件，但照樣開會聽下屬滙報。林高演舊年喺恒基嘅花紅連薪津收成1530.9萬蚊，各位打工仔學嘢喇，睇唔到路都要返工，唔係你估打工皇帝易做？