韓國型男鄭雨盛去咗上海宣傳電影《雛菊》，去咁多日就蒲足咁多晚，繼早幾晚俾記者影到佢約埋全智賢同黎明一齊蒲吧唱K，又俾人影到佢同黎天王去一間高級酒吧尋歡。
噚晚凌晨兩點幾，鄭雨盛又再出動，約埋著名賽車手關兆昌同兩個女工作人員一齊去到位於茂名南路嘅Babyfacedisco消遣。
攔路阻上車
雖然間disco有貴賓房，但鄭雨盛寧願坐廳，貪佢夠開揚夠熱鬧。佢哋4個人先後飲咗好多芝華士加綠茶，只見鄭雨盛成晚好鬼忙，一時同人猜吓枚，一時又企起身跳舞，或者企埋一邊煲煙，心情相當唔錯。
唔單止咁，鄭雨盛仲不時四圍眼望望，唔知佢係驚俾記者影到、抑或想睇吓有冇機會物色到異性朋友呢？
玩至凌晨5點幾，佢哋先捨得走，當鄭雨盛準備上車嗰陣，突然有成班乞兒衝埋嚟，阻住晒唔畀鄭雨盛上車。好在後來有保安人員見到，幫佢哋趕走班乞兒，咁鄭雨盛先可以順利返酒店咋！
