中國銀行就快公開招股，估唔到QDII（合格境內機構投資者）尚未出動，內地已經響晒鑼，日前內地《證券時報》報道，有間叫上海環華投資顧問嘅公司，打出「入會即可享受中國銀行IPO」嘅宣傳廣告，又聲稱自己喺海外背景雄厚，搭通天地線可以喺中行IPO主承銷商攞到新股，不過經該報記者打聽後有啲唔對路，唔排除係一個「局」，內地居民都係謹慎為上，咪俾人「坤」。
呢間投資公司自我介紹話，佢哋同瑞銀集團（中行主承銷商之一）係戰略合作夥伴，聲稱坐定粒六攞到貨，但客戶要先簽委託書，並交每萬股500蚊嘅標準諮詢費，仲要喺香港開設一個證券公司賬戶，若果冇戶口，就要將筆錢滙入去上海環華指定賬戶，然後上網查番中飛情況。
不過，記者搵瑞銀集團求證，佢哋話明同呢間上海環華毫無關係，又表示會保留採取法律行動嘅權力。睇嚟內地股民都係唔好冒險，唔掙在等QDII正式出台時，先買港股都唔遲啦。