聯想集團早前裁員1000人，仲話會將每年慳番嘅2.5億美元，用喺推廣新產品，同埋建立品牌知名度方面。點推廣法呢？原來佢哋已經同西班牙巴塞隆拿球會傾掂數，搵朗拿甸奴（圖，旁為聯想高級副總裁陳紹鵬）做全球品牌代言人。嘩！搵「細哨」做推廣，唔怪之得要裁成千人咁多啦！
聯想話，揀中巴塞嘅原因，係覺得呢個球會比賽時，夠晒拼搏進取，又發揮到團隊精神，同聯想啱晒feel；作為代言人，有錢收嘅朗拿甸奴都好識做，話自己好開心，又自爆成日都用電腦上網搵資料，同埋發電郵畀親友。
華華睇「細哨」踢波就睇得多，見佢西裝骨骨喺度sale電腦，睇落總係有啲唔係好慣，唔知聯想會唔會叫「細哨」攞住部電腦，落場踢兩腳表演吓球技，咪當做產品測試囉，咁先至算物盡其用嘛。