近排假期真係多，小初放完三日假，跟住炒多3日股，周五又再放假。
經紀黃話，證券界有好多人呢個星期直情唔返工，加上大陸宏調陰影尚在，估計今個星期大市唔會太刺激。
此外，證券行班策略員雖然話內地加息冇乜殺傷力，但有部份股票確係暫時忍手較穩陣，好似先前炒到識飛嘅大陸地產股，例如富力地產（2777）和合生創展（754）等累積升幅實在太驚人，而地產股對息口最敏感，所以暫時都係避一避，唔好掂住。
小初問佢1隻細size嘅大陸地產股中新（563）點睇？隻股上周三升上1.29元高位，但受宏調消息影響，由1.29元高位大幅回落，周五初段一度跌破1元水平，但最後拗腰成功，倒升收場。
經紀黃話，傳聞公司有動作跟尾，聽講涉及抽水。
中新上周五一度低見0.91元，收報1.07元，升7％，成交股數4701萬股，金額4949萬元。
慕容小初