魔警，除了令人想到恐怖震慄的尖沙嘴槍擊案外，原來可以是輕鬆惹笑兼且娛樂性豐富。沉醉魔法世界的警員李行齊，一雙巧手會變無數魔術，不但把「魔警」概念扭轉，還接連摘下多項公開賽冠軍，去年更代表香港遠赴海外參加亞洲賽，被上司同袍封為「魔術警察」。
由一張鈔票開始
李行齊曾任機場特警，現為新界南警犬隊領犬員，他的魔法人生由一張鈔票開始：「4年前見到魔術師將一張銀紙懸空升起，覺得好神奇，於是決定去學魔術。」去年小齊贏得舞台魔術公開大賽和業餘魔術師大賽兩項冠軍，還代表本港往泰國參加亞洲賽，雖未能獲獎，但表現備受讚賞。醉心魔法的小齊，慶幸得到妻子支持：「太太永遠係我第一個觀眾。」
小齊直言被魔術改變了人生：「喺台上表演時，俾觀眾踢爆都唔可以發脾氣，又要識得同人溝通，學識點樣聆聽同表達自己，對辦案好有幫助，𠵱家對市民都特別有耐性。」小齊公餘時還跑到老人院或孤兒院作義務表演。
做警員係我理想
雖醉心魔術，但小齊說：「做警員係我嘅理想，唔會為魔術而放棄！」他入行的決定原來與一位中學教師有關：「我讀書時好奀皮，又記過又打交，好多老師都睇死我。後來遇到中五班主任鄧Sir，佢係輔警，好畀心機教我，重叫我做班長同風紀。因為佢令我對警察留下好印象，就立志要做差人，唔可以辜負佢。」
記者 吳淑義