港股升到17000點，進入調整期，意料中事；到目前為止，調整得好溫和，消化完之後，仍可看好，點解？理由係散戶未瘋狂，未瘋狂，點會滅亡！
今次升市，散戶玩得好「精」、好「叻」，低位買貨，高位沽貨。雖然大市成交屢創政府入市以來新高，個市係咁升，但散戶就係咁減磅。其實，大家可以睇吓自己，問吓周邊朋友，手上嘅貨，揸到成手都係，抑或好輕身？
有一樣，唔使調查，都可以睇到嘅，就係大藍籌同大國企中資股，都歸晒邊，基金同大行上晒手。中國人壽（2628）、中石油（857）、中國鋁業（2600）同江西銅（358）等，升到呢個位，散戶手上仲有幾多？
唔係話大市唔會落，但落嘅幅度，唔會大。上個禮拜，落到20日線（16444）就反彈，但即使跌穿，亦唔係大件事，守得住50日線（15999）之上，後市仍可以睇好。
中國加息，一次起，兩次止；宏調影響，唔會太大；美國息口好快見頂；資金流向個勢冇變、好充裕；拉勻嚟計，基本條件對股市仍算有利，大市唞完氣，可以再上，目標係17500至18000。
首個目標3.5元
新股呢輪熱火朝天，上周四掛牌嘅上海集優（2345），中資線消息話到明要砌上去，第一個目標係3.50元。集優認購時好墟冚，發售6億股，國際配售近100倍超額，公開發售則近500倍認購，首日掛牌，最高3.075元，成交6.35億股，多過發售之數，上周五就成交1.5億股，理論上大部份股票都轉咗手，大行同基金攞唔足貨，應已在市場補夠，貨源歸邊，任佢舞。
集優主要生產電機組件及工業用具，受惠內地經濟高增長，前景看好。盈利支柱的葉片製造業務，已接獲明年交付的海外定單，而緊固件業務更接滿2008年的定單；至於軸承、刀具和電動機的定單，亦已得到保障。
集團將整合生產同採購部門，提升規模效益，生產更多高端高毛利產品，以及拓展海外市場。
中油（香港）（135）股價雖急升，但基金仍大手扯吸，摩根大通就在上月21日增持1359萬股，每股作價4.52元，總值6143萬元。中油現時仍在整固中，一升穿5元高位阻力，有機會坐6望7。
郭兆誠