年年工聯會搞五一酒會，政府高官都會畀面撐場，今年呢，煲呔去咗外遊威威，咁呢個撐場行動，就交咗畀肥龍。噚日三位局長周一嶽、葉澍堃同林瑞麟，以及特首辦大內總管鬍鬚曾都有出現，加埋張建宗同林鄭月娥都有到一到，算係幾大陣容㗎喇。
當然除咗一啲應該到嘅愛國愛港人士之外，都有兩名民主派星級人馬到場，就係公民黨黨魁Audrey同傑哥。原來佢哋都係因為收到請帖，所以都嚟一嚟湊吓熱鬧。咁又係，貴為新黨，梗係要同其他組織嘅重量級人馬social先至有前途。
自從有報紙話魔警徐步高要暗殺老董後，老董都無回應過。噚日老董難得都在場（佢剛從舟山老鄉回來），梗係俾人圍住晒，追問佢驚唔驚？不過老董只係面不改容咁笑騎騎，一句都無回應，唔知佢係咪想以笑容話畀大家聽：我點會驚呀？
過去一年都不時同政府「撐到行」嘅工聯會，喺酒會致辭都係嗰句：快啲搞掂最低工資。會長棠哥重申，唔希望最低工資要交去策發會處理。就算佢無講明，大家都知道策發會有幾大作用啦，係咪？
爆料熱線：29290000、27860099
報料傳真：26239278
報料電郵：[email protected]