汪明荃與杜琪峯為西九諮詢名單掀起的罵戰尚未平息，一向言論出位的杜汶澤昨日力挺汪明荃（阿姐）有理，阿澤更諷刺杜琪峯說：「拍戲叻唔代表可以統治世界。」阿澤又指杜琪峯以為自己係黑社會，未清楚了解便胡亂批評。
球壇盛事、4年1度的世界盃即將開鑼，有線於賽事期間舉行「2006有線世界盃嘉年華」，並邀請杜汶澤、張達明、彭敬慈、林子聰及梁慧嘉等擔任嘉賓主持，昨日眾星出席於尖沙嘴舉行的記者會，先來一場舌戰。
導演杜琪峯與阿姐汪明荃近日為西九諮詢名單掀起罵戰，阿姐力斥名單不夠代表性，未能代表粵劇界別，杜琪峯則指阿姐言論不當，「阻住地球轉」。昨日杜汶澤主動向在場記者了解事件後加入戰圈，力撐阿姐說話有理。
「唔亂霎氣」
杜汶澤指杜琪峯未真正了解事件，便出言批評的做法不正確，杜汶澤說：「杜導演應該多啲去研究，了解多啲先至去抨擊人，拍戲叻唔代表可以統治世界，可能佢拍得《黑社會》多，以為自己係黑社會，但係佢唔係，好明顯我係支持阿姐，阿姐唔係亂霎氣嘅人，佢係好講道理，如果唔係唔會叫佢做阿姐，佢又唔係黑社會大家姐，有道理先會受人尊重。
專心拍戲
阿澤續說：「政府不嬲都冇承諾批一個場地畀粵劇界，可能佢知啲唔知啲，有啲嘢查證過先至好評論，我睇完佢話阿姐阻住個地球轉，都有啲唔開心，唔通個地球倒轉嚟轉，都唔理佢，都去支持咩？」
杜汶澤為阿姐挺身怒罵大導演杜琪峯，會否擔心激嬲對方，而被封殺冇戲拍？阿澤堅持己見謂：「做人是非黑白要識得分，佢都有發表佢嘅意見，希望佢專心拍戲造福社會。」
採訪、攝影：張俊銘
