呔真係拜得神多自有神庇佑，除咗成千上萬自由行大軍湧落嚟支持特區零售酒店旅遊業，今日內地個社保基金條大水喉亦可以開始嚟香港買股票買債券，成為第一個QDII。有佢扯頭纜，相信其他QDII會陸續到，咁仲唔炒到飛起，套句煲呔嘅講話：「今次真係想窮都難囉！」
乜嘢係QDII？中文叫做合資格境內投資機構；簡單啲講，就係得到阿爺批准，准落嚟香港或者其他境外地區投資嘅內地機構。仲唔明？唔明唔緊要，不過千祈唔好俾人知你唔明。大家都有眼睇啦，上個禮拜銀行公會個午餐會，煲呔窒啲賓卡復活節掛住去打哥夫做Spa，唔去敲周小川劉明康道門趁QDII爭取生意。八方聽聞班賓卡未即時行動，皆因QDII未有細節，但煲呔已經拍晒枱，如果你話畀佢知唔知QDII點解，佢爆粗都似。
煲呔點解咁㷫，據說係因為金管局任總裁。話說當日任總裁同煲呔一齊坐主家席，傾傾吓偈，任總話人民銀行宣布咗QDII，但香港呢邊啲人好似冇乜反應；煲呔一聽火都嚟埋，所以上台演講時就好似上咗身咁，教訓班賓卡，質問人"Wherewereyouguys?!"
講起QDII呢樣嘢，其實任總又係有啲功勞嘅，因為呢個概念係佢最早提出嚟，佢同轉咗搞智經嘅陳德霖，都為爭取呢條大水喉出咗唔少力，只不過當初用錯名，叫人「北水南調」，北方啲人一聽到就火滾：大佬，已經畀咗咁多嘢你啦，仲咁貪心？所以就壓住咗，後來改一改個概念，唔係吸你啲水，係Q你哋I啫，即係幫你洩洪，咁卒之。
雖然肥但轉身快
嗱，最醒目就係馬局長。佢復活節個假期，既冇去打哥夫又冇去沖涼，而係帶咗團北上去敲人哋道門。雖然局長北訪原來安排係去講CEPA，但你唔好睇佢肥肥哋，轉身都轉得好快，上到北京當然係講QDII啦。咁都未算，前日佢自己寫專欄，講北京之行，都大講特講QDII。有咁醒嘅局長，一啲都冇失禮強政勵治啦。下次煲呔拍枱，大喝"Wherewereyouguys?"馬局長可以企起來，高聲回答"Beijing,Sir!"
爆料熱線：29290000、27860099
報料傳真：26239278
報料電郵：[email protected]