「你今日blog咗未？」呢句話已經成為潮人口頭禪。所謂blog，即係網上日誌，內地叫「博客」，每秒鐘，全球就有一個blog誕生。我「shopping精」就有個「消費blog」，專講消費心得。
其實blog本身同消費嘅關係幾密切㗎，因為好多blogger都鍾意講吓最新款嘅電話、電腦等等抵唔抵買，我成日睇吓啲blog攞意見。日本東芝好快會有新服務，顧客用手機影低產品條碼send去一個中心，手機會收到所有blog友對呢件產品嘅讚、彈口碑。
我朋友Eric喺一間教人做網頁嘅公司FevaWorks做經理，係佢教我做blog，喺yahoo之類免費申請個blog，仲可以揀背景音樂、顏色。Eric話，最近新興videoblog，用手機影低平日見到嘅嘢放喺blog，「香港人寫嘢可能冇台灣、內地blogger咁叻，但用video就唔怕。」
講開又講，阿媽話：「食過五月糭，寒衣方入槓。」端午節好快到，係時候收埋寒衣；好多人會將吸濕劑同防蟲劑一齊放落衣櫃，但原來消委會話，有啲吸濕劑係唔可以同樟腦、臭丸放埋一齊㗎，如果唔係就會產生化學作用，損害衣物；所以買吸濕劑嘅時候，就要睇清楚說明，可唔可以同防蟲產品共用。仲有呀，收納羽絨被、棉被要有足夠空間畀佢自然膨脹，保持鬆軟，如果用真空壓縮袋，長時間壓縮收藏可能會影響保暖度㗎。
我嗰日一邊上網寫個blog，一邊發現原來有啲除濕劑唔可以同樟腦一齊用，所以我後來買咗呢個可以兩者一齊用嘅除濕器。
逢周二刊出