數碼影音：R-D1s　插LEICA鏡全手動　古典機械DC

雖然現時數碼相機大行其道，不過好多攝影發燒友仍在回味過往機械相機嗰種「集」一聲嘅快感；EPSON繼推出集機械機與數碼相機於一身嘅R-D1後，又有一部改良版嘅R-D1s，讓各位享受攝影樂趣嘅同時，可慳番唔少菲林。

記者：許福合
攝影：何家亮

上代嘅R-D1因為係首部連動測距（Rangefinder）嘅數碼相機，一推出當然非常搶鏡，成為一時話題，不過當時定價高達$30,000！絕不便宜，今次新返R-D1s改良功能之餘，重將價錢減咗近一半，相信可讓攝影發燒友「忍痛」出手！

■轉盤指標密密麻麻，集多個設定於一身。

■咪錶一樣指標，等同好多DC嘅資料顯示屏。

懷古刻度顯示

與一般數碼相機嗰種唔使用腦嘅影相方式，R-D1s相比下複雜好多；R-D1s操作極力模仿機械相機嘅操作，機頂會見到1個排到密密麻麻嘅轉盤，可設定快門同曝光補償，由於係數碼相機關係，亦加入ISO設定，只要拉高轉盤就可更改，最高可達1600！
更特別係轉盤有1個類似油壓式計表，可顯示電量、相片數量同質素等資料，不過顯示因為用上大量簡寫，如果唔睇Menu一時間都幾難估到代表啲咩。另外，快門掣旁邊更保留咗拉菲林掣，R-D1s當然無用菲林，不過就強制用家影完1張做1次拉菲林動作，否則快門掣完全不會理你！

■機背2"顯示屏使用扭擰設計，方便取景。

■唔用菲林，改為用SD卡！

插值勁上1,200萬像素

講到機背就終於似番部DC，設有2"顯示屏，使用揭起反轉設計，不過筆者直覺用家多會選擇使用Viewfinder，顯示屏就齋用嚟睇相。R-D1s鏡頭接環為EM-Mount（兼容M-Mount），可使用質素極高LEICA鏡頭，而且用上「等倍」設計，攝影師選用鏡頭時就更方便；現時LEICA鏡按質素、功能，售價由$4,500至$23,000不等，配合APS-C尺寸（23.7mm×15.6mm）610萬像素CCD，質素相當高，即使經插值上1,200萬像素，影像仍然相當滑淨！R-D1s還有好多改良部份，包括將連拍由2fps提高3fps，新增RAW+JPEG模式，強化版底片自定功能，效果可完全掌握。