名嘴黃毓民搞嘅社會民主連線噚日開始籌組，佢老友大班冇入黨，但就贊助咗500支玫瑰花畀佢哋義賣籌錢。俾人話係「煲呔針」嘅大班話，唔入黨絕對同煲呔冇關，煲呔同佢冇聯絡，但陶君行繼續窒大班，叫佢將來一定要做「連線針」，幫佢哋同政府收料！
大班話，佢唔入社民連係因為從政係好個人化，綑綁就唔係自願，西瓜靠大邊係唔啱。毓民就同八方講，每個人入黨都要妥協，好似長毛咁，就由激進嘅馬克思主義者，變咗個社會民主，佢都嬲過大班入，但大班有佢嘅考慮，咁都冇辦法。
大班又同八方講，佢下屆未必選立法會，就算再選都唔去九龍東，一來佢未必選得到，二來做人要有義氣，要讓番個位畀上次拍檔陶君行。不過大班最叻聲東擊西，上次話選新界西，結果一個屈尾十就去咗九龍東，一日未到截止報名，都唔好信大班話會唔選，因為連佢自己都保證唔到。
爆料熱線：29290000、27860099
報料傳真：26239278
報料電郵：[email protected]