爆機狂迷：PSP首隻撈的測試遊戲<br>《LocoRoco》網迷高度評價　未出先紅！

爆機狂迷：PSP首隻撈的測試遊戲
《LocoRoco》網迷高度評價　未出先紅！

用PSP單撈試玩遊戲，之前唔係未試過！但係呢類Sharing，只要一離開Spot熱點，熄機再開番，就會乜資料都冇晒！配合V2.7正式推出，SCE首隻可直接落「的」嘅PSP試玩遊戲亦同步誕生。《LocoRoco》可經PC上網單撈，然後收藏喺記憶卡內無限次任玩；呢招煞食處，係表明SCE以及其他遊戲開發商，日後可在網上遊戲推出更多試版！相信距離用「的」玩PSP遊戲嘅日子，近喇！

記者：陳國輝

由PC直撈遊戲落卡，故然係焦點所在。不過《LocoRoco》呢隻實驗性作品被廣泛討論，亦係不爭事實！外國權威網站GameSpot，就喺遊戲發表第一晚，給予PSP遊戲史上最高評分，前途無限！同時日本雜誌以及台灣遊戲網站，都有唔少篇幅介紹，仲成為討論區NO.1Topic，認真巴閉！《LocoRoco》講述一隻可愛又神秘嘅生物，經吸食植物嚟結合或分裂，然後通過每一關，睇落好似幾簡單，玩落就知勁難！

■主角天生好似歌神咁，鍾意不停唱歌，相當可愛！

■外國網站GameSpot給予遊戲高度評價，係必玩之作！

喪玩結合分裂過關

咪以為動作Game都需要靠方向掣或者Analog嚟過關！簡單啲講，玩家唔能夠直接操控LocoRoco，只憑L、R兩粒掣，令地面不斷向兩邊傾斜，使到主角像波不斷滾動。聽落好似幾易玩，實情地勢變化多端，若以為單靠轆轆吓或者跳躍可以過關，咁就太過膚淺喇！LocoRoco透過不斷食植物令自己變大，關鍵就係於適當時，佢需要用結合嚟擊敗敵人，或跳過更高嘅地形；另外，佢又需要以分裂嚟通過窿窿罅罅嘅地形，不過一旦分裂之後，細細隻嘅LocoRoco就會好易走失，而且仲會有怪物走嚟將佢「擔」走，正所謂「丫污公」嚟喇！

■利用搖搖板槓桿原理協助走動，經常會發生。

■像漏斗形嘅狹窄地勢，LocoRoco要分裂咗先過到！

■天上面好似食鬼嘅飛天怪獸，需要跳高擊落佢！

■部份地形係有生命㗎，主角可藉助佢哋過關。

嘈醒月亮拎隱藏植物

想簡簡單單咁到達終點過關，其實勁EasyJob！但係，假如你想玩到所謂嘅100%完成，包括拎齊晒第一關嘅20隻LocoRoco、3隻神秘小草人以及515粒飛蟲果實嘅話，咁就需要花你好多時間！《LocoRoco》最難玩之處，係每一關都有超多隱藏要素，例如隱形通道或撞牆會發現密室，萬一唔留意都好易Miss！好似當玩家到達月亮住所嗰陣，你唔止要儲齊15隻以上LocoRoco，仲要唔準郁企定定，過幾秒後，LocoRoco就會開始唱歌，嘈醒月亮拎隱藏植物，聽落真係幾搞鬼，不過冇攻略似乎難過關喎！

點樣單撈LocoRoco？
Step1

進入官方網址www.locoroco.jp之後，先細閱故事內容及角色介紹，順手可單撈埋Wallpaper。