曾特首教訓一眾賓架，要掛住工作，唔好成日掛住放假、打高爾夫。弊傢伙，中國假期與香港唔同，復活節、耶誕之時，香港放假，上面照常辦公，以後啲賓架好唔好趁復活耶誕，放個長假呀？不如曾特首下令香港依足中央假期廢除與耶穌有關嘅香港假期，之後如果中央突然宣布甚麼QDII、QFII，香港賓架就唔會烏垂垂啦！
曾特首敲枱講Wherewereyou,guys？震動銀行界，好快就成為口頭禪。左丁山食飯時碰到賓架L，問佢復活節假去咗邊，是否去咗中山打波，賓架L答：「Yes,sodamnwhat?」，夠仆喎，不過唔夠膽喺特首面前講，只敢向左丁山講，因為唐人最怕高官呢味嘢，不怕官，最怕管吖嗎！公開得罪特首？容乜易引起任總裁對銀行垂注呀！
賓架L憤憤不平：「乜嘢關於QDII嘅詳細資料都未宣布，我哋點去敲周小川、劉明康道門呀！搞官商勾結呀！等上面發放詳情，甚麼試行辦法出籠後，我哋梗會第一時間起動啦，使乜特首咁勞氣！即使係佢爭取番嚟嘅，thatispartofhisjob，點樣去鑽營商機，係我哋嘅事，與佢無關！」
中國人有DNA指揮我哋腦袋：「富不與官爭」，算啦，特首鍾意講乜就講乜，大家當佢係棟篤笑明星便是，呢幾日又放假嘞，問賓架L去邊度打波，佢話：「老細來電要求澄清特首之言，我哋有冇走咗雞，以免佢下次見到特首之時，畀佢問到口啞。剛好又碰到人民銀行加息，風頭火勢，我於是取消咗外遊，改為留港消費，以免碰到人民銀行突然宣布一啲宏觀調控政策之時，老細打電話嚟問：「Wherewereyou？」
左丁山聽到哈哈大笑，曾特首果然夠權威，大喝一聲之後，即刻有人唔敢放假遠遊。特首咁強勢，是否香港之福？咁又未必噃，一個人high得滯，好容易有強人傾向。泰國總理他信就因為迷信自己係強人，先至搞出個大頭佛。