謝太：喂？
Karen：謝太？Karen呀。上個禮拜好刺激，你有冇睇住個市呀？股市個波幅好大！大陸就話宏觀調控，美國就話息口見頂，簡直就係一步一驚心，中央政府叫人民銀行配合宏調加息，咁就嚇死好多人。正當大家三魂唔見七魄嘅時候，美國聯儲局嘅伯南克，又話加息開始見效，可以停一停，睇定啲先。最後中央政府仲嫌個市唔夠刺激，將QDII嘅實施時間，校到呢幾日開始。
政策飄忽要分散風險
謝太：咁美國息口見頂，對我哋肯定係好，而大陸做宏觀調控，做咗咁多次，都應該吸取以前嘅教訓，唔會亂咁嚟。今次大陸學晒啲先進國家，識得用加息來做宏調，比以前一刀切唔畀放債好好多。我覺得係goodsign！
Karen：係呀謝太，仲有今次大陸喺冇通脹壓力之下做宏調，都應該會好細心咁諗定先出招。其實，今次呢個QDII就係諗定先出招，中央政府見到好多大陸金融機構太多錢，水浸，就算大陸啲bankers做晒功課，睇清楚每個借錢人嘅投資項目，個別來講都有合理回報，不過因為個個都係做同樣嘅投資，搶爛市，搞到還唔到錢。咁QDII就係畀大陸嘅錢走出去，唔使谷晒喺國內，金融機構可以分散風險。我覺得QDII係大陸貨幣政策，行宏觀調控其中一個板斧，亦因QDII可以做到「北水南調」炒起香港嘅市，我諗今次都算係第一次有宏觀調控嘅政策幫到香港股市。
謝太：咁宏觀調控嘅QDII幫助分散風險，等金融機構啲投資安全性同回報，唔使同大陸經濟表現掛鈎，大陸經濟好嘅時候就好風光，經濟差嘅時候就大大鑊，又可以同時炒起個市，都係件好事。不過，始終聽到宏觀調控呢四隻字都有啲驚。其實Karen呀，𠵱家我哋背靠祖國，仲有冇好股係完全同香港或大陸嘅經濟表現冇關係㗎？等我可以買番啲，幫自己都做分散風險。
Karen：謝太，我上個禮拜，已經覺得喺唔知道政策會幾飄忽嘅宏觀調控之下，都應該分散風險，呢幾日假我都做咗功課，香港真係有隻好股，大陸經濟有幾差都唔關佢事。呢隻就係330思捷環球！
謝太：Esprit？佢唔係喺大陸賣衫嘅咩？我仲估佢喺香港靠黃金周自由行？
博Esprit產品組合改善
Karen：唉吔，謝太！你估我講緊Baleno咩？Esprit有90%嘅收入來自歐洲，淨係德國都已經差唔多佔一半，賺嘅都係歐元唔係人民幣，佢哋仲要唔鍾意對沖歐元嘅郁動，搞到思捷環球變成隻賭歐元升嘅股票。
咁，Esprit嘅股價就真係差唔多成年冇郁過，不過都係因為佢哋舊年嘅產品組合唔賣得。我覺得係因為佢哋呢幾年，增長得非常之快，快到管理層揀貨睇漏眼，仲聽講話負責揀貨嘅管理人員當中發生好多事故，有人不幸去世，又有人患重病，仲有人有喜放分娩假，不過如果今年Esprit產品組合都係唔賣得，我就真係唔知道佢可以賴乜啦！
謝太：雖然股價成年冇郁過，不過真係抵買？
Karen：抵！雖然Esprit股價冇郁過，不過每股盈利都有雙位數字增長。𠵱家Esprit賺嘅每$1，你只要用$20就買到，幾年難見，04年嗰陣時要用$30先至買得到。只要Esprit產品組合唔再出錯，同歐元對美金升，思捷環球就抵買有排升。
謝太：原先我都知係想搵個宏調避風塘啫，不過聽落淨係博思捷環球執番好產品組合，都抵買。好！Karen幫我買。咁幾時放？
Karen：Thankyou謝太。至於幾時放，我哋都係逆市咁博Esprit產品組合唔會再錯，所以如果唔係咁，就即刻放，不過如果我睇啱咗，就畀佢升吓先。
謝太：Ok，Esprit產品組合如果有新消息，你打畀我啦。