都話要有競爭先會有進步，展覽主辦商GlobalSources雄踞機場新展館，不斷同貿發局擦出火花，4月鬥完之後，下次高潮就喺10月，睇怕到時仲有連場好戲！唔講唔知，雖然話GS今年先正式登陸，但呢間公司嘅創辦人韓禮士，64年已經來港。佢做咗咁多年展會，到家吓次次開show前都仲係好鬼緊張，所以一有空檔，佢就會四圍旅行輕鬆吓。
韓禮士話2月嗰陣先孖住老婆去完古巴，下個目標係去南極，不過要去得成難度都幾高，時間、身體狀況都係其次，最難過係佢老婆嗰關，點解？事關佢位太座好怕凍，而更大問題係，南極冇得shopping！
提到退休，韓禮士一聽到呢兩個字就耍手擰頭，話冇可能停低唔做嘢，咁會老得好快喎！唔好以為佢係咁意講吓，事關佢曾經退下火線5年，但最終都係頂唔順，要重出江湖。