白銀戰隊！熱烈慶祝！iSharesSilverTrust（SLVUS）「白銀投資信託基金」（下稱「白銀基金」）成功上市！白銀投資信託基金，喺上個禮拜五2006年4月28日喺紐約上市，孫柏文諗大家作為白銀戰隊成員，不出幾年之後回望，一定會覺得呢一日，係白銀戰隊抵抗「紙幣狂魔」侵蝕大家購買力嘅抗戰中，一個非常重要嘅里程碑。
我諗我「白銀文」一世都唔會忘記，得悉「白銀基金」成功上市嘅一刻。香港時間禮拜五晚上，我同因湊女忙碌，而暫時讓篇幅畀我嘅《利字當頭》一欄總舵主利世民兄，喺網上視像通話，一路睇住佢湊女餵奶，就一路喺網上睇新聞網頁。
我一睇到已經等咗好耐嘅「白銀基金」成功上市嘅消息，我就忍唔住叫世民兄等等，然後就企起身，行去酒櫃幫自己倒咗杯威士忌，同埋點口雪茄，跟住返電腦前面，用我扮得最似樣（不過其他人唔覺得似）嘅前宗主國口音，講咗一句：「Thisisnottheend.Itisnoteventhebeginningoftheend.But,itis,perhaps,theendofthebeginning.」大約可以繙譯成：「呢齣戲仲未到結局，連結局嗰場戲都未開始，不過可能已經到齣戲第一部份嘅結尾。」講完之後，就連世民兄嘅BB女都笑咗出嚟。咁世民兄都笑住話：「你估你係邱吉爾咩？」
白銀文係唔係邱吉爾大家先知，不過，「白銀基金」嘅搞手巴克萊銀行（BarclaysBank）對我哋嚟講，就肯定係當年盟軍成功研製核子彈嘅洛斯阿拉莫斯實驗室（LosAlamosLaboratory），「白銀基金」成功上市呢一日，就有如將核子彈上船運出南太平洋嗰日一樣。
迫淡友通街搶白銀
而點解呢個「白銀基金」會令到銀價上升呢？白銀文曾經用咗隻金手指，為大家篤過有關巴克萊銀行「白銀基金」嘅細節，希望大家唔好覺得我chum，等我再講多次。佢係一個有股票編號嘅基金，可以好似股票咁買賣。你每買一手基金，巴克萊銀行就即刻喺公開市場買一盎斯實貨白銀放響貨倉裏面。等大家買實貨白銀好似買股票一樣咁易。點解咁做？因為好多花旗國市民，除咗買股票外，其他投資渠道欠奉，同埋如果就咁買紙上白銀，冇實貨白銀交過手，啲拋空白銀嘅淡友就可以無止境咁拋空嚟壓銀價。咁投資者透過買「白銀基金」，迫呢班淡友交實貨白銀出嚟，拋空咗白銀嘅淡友仲唔通街搶入白銀交貨？
因為我都知道，好多我嘅fan屎都話，買實貨白銀好煩，所以希望「白銀基金」他朝可以喺香港上市，等大家都可以容易啲買到實貨白銀。
孫柏文