煲呔想唔認係港台事件嘅幕後黑手都唔得，因為實在太多手指模。首先，八方係其中一個親耳聽到佢拍枱拍櫈大罵港台嘅傳媒中人，當時所有在場人士都知朱培慶只有死路一條，只係時辰未到。
經過大半年時間，由審計署進駐開始，港台只係喺度倒數緊日子，因為7條友坐入港台7個月，點都搵到啲料啩？八方本來都有啲為朱處長驚，怕佢哋有啲蘇州屎被人揭露，點知只不過係叫個司機去買報紙同埋扮闊佬喺記協Ball買咗圍枱之類嘅「罪狀」；但鄧國斌照話港台表現不利煲呔強政勵治，而王永平更即刻撲出嚟要人交報告交人頭。
正所謂欲加之罪，何患無辭？人哋放大假同老婆返祖國遊山玩水，朱處長就喺屋企閉門做功課，應付下個星期一同星期二兩日嘅立法會賬目委員會會議。呢場肯定係硬仗，好彩港台仲有好多fan屎。
話時話，港台由呢個月起，叫停已經有14年歷史嘅政黨論壇，融入自由風就算數；至於城市論壇，一台會同時轉播，但係要播完新聞天地先，即係delayedbroadcast。港台話此舉為咗慳錢，與政黨冇關，信唔信由你啦。
爆料熱線：29290000、27860099
報料傳真：26239278
報料電郵：[email protected]