甄子丹回流發展，其妻汪詩詩亦嫁雞隨雞，帶兩歲囡囡自加國返港團聚。上周甄子丹闔家到跑馬地茶餐廳歎平民餐，銀幕上打到飛起的他手抱女兒卻雞手鴨腳，更被外母當街教訓抱B姿勢不正確。
銀幕上的甄子丹硬橋硬馬、拳拳到肉，但現實中這位鐵漢面對嬌妻汪詩詩和兩歲大寶貝女Jasmine卻即時軟化，搖身變成住家男人，近日其外母遠從多倫多來港探望愛女乖孫，湊巧甄子丹暫時毋須開工，即趁機盡享天倫樂。
當街教路
上周一晚9時多，甄子丹偕妻女、外母及姨仔，舉家拉隊出現跑馬地成和道，踢拖、穿緊身背心及短褲、展示大隻佬身形的甄子丹，以強勁臂彎環抱女兒Jasmine而行，趴在老竇懷抱的囡囡則頭枕父肩，小手抓實父親大嚿老鼠仔，場面溫馨有趣。
不過，尾隨的外母則指甄子丹抱B姿勢不正確，當街對他說：「你咁樣抱佢，佢咪睇唔到前面嘅嘢囉。」隨後甄子丹一家抵達附近表哥茶餐廳開飯，歎足1個鐘。離場時甄子丹收起健碩身形，披上恤衫之餘亦同時變招，依足外母訓示，改變抱囡囡姿勢，再偕妻和外母一同漫步到下榻的雲地利道酒店式管理大廈。
拖手返家
而前晚10時多，同樣穿背心及短褲街坊裝的甄子丹又偕妻和外母再次出現跑馬地，同往知足樂享受腳底按摩，他離場時還瀟灑撥髮，接着才與太太手牽手同返新居。
由於近年甄子丹大多時間留港拍戲，所以太太汪詩詩早前便帶囡囡自多倫多返港，一家團聚，並舉家遷進跑馬地酒店式管理大廈，月租近5萬元。
採訪、攝影：娛樂突發組
