啱啱過咗嗰個星期六，一早返到公司睇報紙，最關心嘅除咗係某寬頻公司職員，盜取他人資料申請服務呃佣金嘅新聞之外，另一單最值得留意嘅新聞，係有公共小巴撞車翻側後着火焚燒。仲記得我喺4月26日響呢度同大家討論小巴超速呢個問題，點知隔咗幾日就有小巴出事，可幸車上各人僅受輕傷，但車就完全焚毀。
講真，大家都知道小巴司機往往要跑多幾轉去賺取更高收入，所以早將超速這個問題當作閒事。
部車開快啲雖然可讓乘客早啲去到目的地，司機大佬又可以走多轉，但大家有無諗過咁樣會危害到自己或者其他道路使用者嘅安全？君不見龍翔道和青山公路每日都有多場「紅色小巴格蘭披治大賽」，同埋喺屯門公路有呢個「通宵綠頂邀請賽」舉行咩？在此，我希望一班司機大佬開着小巴在街上行走時，請謹記保持安全車速，上落客時還要畀多啲耐性，讓乘客坐定才開車。至於作為乘客的你，若遇上小巴超速的話，應立即向司機提出減速的要求，若司機不理會的話，大可記低日期和車牌，致電交通投訴組投訴，讓他們作出跟進，電話係28899999。
記者：鄭達基