添馬艦今日起正式進入曾蔭權時期。事關喺嗰度興建政府總部前，政府會以短期租約形式外借，普羅大眾以後要踩隻腳入去，難過𠵱家好多。一直反對喺添馬艦起政府總部嘅「保護維港行動」，噚日連同好多個組織，趁添馬艦最後一日開放搞咗個大型嘉年華會，等全港市民都可以用吓呢塊地王，唔使淨係俾政府高官同立法會議員獨吞靚景。
煲呔孫公雙雙失蹤
話明最後一日，吸引力梗係大好多，加上噚日天清氣爽，所以好多一家大細齊齊去添馬艦玩番日。玩咩呢？咪一齊放吓紙鳶、一齊畫吓畫咁，齊齊用行動表示反對添馬艦建政府總部。大會話有近1500人參加，計番都成300幾個家庭，都算係咁㗎喇。
查實大會原本請咗煲呔同孫公出席，最終就梗係無個到啦。身為活動發起人嘅立法會議員郭家麒醫生講到呢度就好勞氣，責難兩位高官好小氣，認為就算意見不合，都可以親自出席解吓畫，使唔使隱咗形呀？
有啲人覺得郭醫生好儍，明明民主黨同民建聯都話支持政府啦，你仲反對嚟有乜用呢？郭醫生查實都睇到米已成炊，好難扭轉局面，但依然覺得場仗未打完噃，只係𠵱家條戰線，由喺唔喺添馬艦起，退後到究竟要起咩啫。
唔止郭醫生話會用盡每一秒鐘繼續抗戰，連卿姐都不言敗，佢話就算今次失敗咗，都會屢敗屢戰，總之做得幾多得幾多。公民黨梁大狀都係咁話，佢話幅地本身就係全香港市民嘅，應該畀個機會市民諗諗呢幅地要點搞。唔知喺佢哋三位努力下，會唔會有奇迹出現呢？
傳真︰2623-9278
電郵︰[email protected]