泰國前總理他信無官一身輕，佢前日就同埋仔仔來港旅行散心。始終都係前國際政要，警方唔敢怠慢，佢哋兩父子同班自由行人迫人巡旺角，不單坐寶馬防彈車，沿途又有大批G4隨行保護，都好陣容強勁。八方問過警方做乜咁大陣仗，究竟有乜安排，不過發言人就話唔會評論個別保安安排喎。
睇嚟他信都幾鍾意金銀珠寶，有記者前日見到佢兩父子喺珠寶店選購名錶珠寶，最後仲拎住成大袋戰利品離開，出手都好闊綽吓。
可惜他信嚟香港呢段時間，煲呔返咗內地放大假，唔係佢可以同煲呔見吓面，話畀煲呔聽做領導一定要尊重民意，唔係就會好似佢咁要喺人民壓力下黯然下台。
傳真︰2623-9278
電郵︰[email protected]