杜琪峯與汪明荃近日為西九諮詢名單掀起罵戰，商台今日擺下龍門陣，邀請兩位當事人當面對談。談到被阿杜指摘應收聲，否則「阻住地球轉」，阿姐反嘲對方妨礙言論自由，又說：「我好驚佢，講嘢好似啲黑社會口脗咁嘅？係咪拍得黑社會嘅戲多呀？」
汪明荃數度炮轟西九龍文娛藝術區發展計劃諮詢委員名單不夠完善，更直指粵劇界發展委員會主席劉千石與周振基不夠代表性，兩人根本不了解粵劇界的難處，又揚言要視乎特首曾蔭權如何幫助粵劇界，再決定會否支持對方連任。事後身為香港藝術發展局電影及媒體藝術主席的杜琪峯，直斥阿姐的言論不當，更指她不要「阻住地球轉」。
阿杜冷淡
「搵埋西九代表先上」
商台有見兩位演藝界猛人掀起罵戰，即時邀請阿姐和阿杜在節目《巴巴閉邊個夠我查篤撐》中一起討論西九問題，商業一台節目部發展經理盧覓雪昨日在電話中說：「阿姐因為拍劇關係，聽日唔可以親自上節目，有其他代表嚟，而杜Sir話搵埋西九諮詢名單嘅代表，佢就唔介意上嚟討論，𠵱家我哋已經聯絡緊有關方面嘅代表。」
記者昨日致電向阿姐求證她會否到商台與杜琪峯對談時，她笑着說：「我𠵱家好驚佢（指阿杜），佢咁惡喺度叫我收聲，講嘢好似啲黑社會口脗咁嘅？佢係咪拍得黑社會嘅戲多呀？呢啲我講笑啫！特首都未叫我收聲，佢有乜資格叫我收聲？香港係言論自由社會嚟㗎嘛，聽日我一早要開工，去唔到商台，但粵劇界嗰邊會有代表出席，好似羅家英、阮兆輝同龍貫天咁。」
而杜琪峯昨日則在電話中說：「我想重申唔係要針對任何人，我只係針對件事，由頭到尾我都係絕對支持粵劇呢項文化藝術，係應該保留嘅，政府係應該幫佢哋搵專門嘅場地做表演，但西九嘅文化藝術項目喺幾年後先開始興建，𠵱家只係一個諮詢期，咁政府既然定咗劉千石同周振基做粵劇界代表，咁咪睇吓佢哋做成點先批評未遲，𠵱家唔需要咁大反應住，我作為香港藝術發展局嘅媒體電影藝術主席，對西九嘅文娛發展，我哋都有同藝發局主席馬逢國反映，其實藝發局亦都包埋粵劇呢項藝術喺度，冇人唔尊重呢項藝術，阿姐唔使咁快喺度嘈嘈閉。」
對於商台邀請他上節目與阿姐對談，阿杜說：「如果佢哋搵到西九代表人物上節目，我先會上去，如果只係我同一啲粵劇界代表對談，其實冇乜意思，我又唔係要同佢哋嗌交。」
家英心疼
「阿姐講公道說話啫」
另一方面，對於阿姐汪明荃與杜琪峯之間的爭拗，羅家英昨日在電話中力撐女友，他說：「吹縐一池春水，干卿底事呢！呢句說話係講畀導演聽嘅，我哋係粵劇界，佢係電影界，阿姐講番粵劇界嘅嘢，又關佢乜嘢事呢？正如政府如果話撥款支持電影界，我哋走出嚟話唔好，咁佢又點睇？大家都係娛樂界嘅人，點解都唔體諒大家互相扶持？」
問阿姐是否希望擔任西九粵劇界代表時，家英哥堅決否認說：「千祈唔好咁講，佢唔會做，我都唔會，粵劇界有好多人喺度㗎嘛，好似陳劍聲咁，阿姐只係不平則鳴，見到唔公平就出嚟講番句公道說話啫。我都覺得嗰兩位唔夠代表性（劉千石和周振基），點解要搵佢哋兩個先？係咪因為佢哋同何志平係好朋友關係？」
採訪：戴彩煥、陳月媚
