立體版拳皇前年食住凡事3D化嘅風氣響PS2登陸，不過基於玩上手感覺遠不及平面版，仲加埋某啲系統設定得過強，搞到打起嚟完全變咗另一回事，令一眾Fans失望而回。𠵱家續集佢知恥近乎勇，將唔好嘅地方盡量改善，再加咗幾騎呢吓嘅BonusGame同角色第2套衫，娛樂性因此激增，至啱格鬥玩家留喺屋企煲機之用。
文：陳福榮
《拳皇MaximumImpact2》（簡稱《拳皇MI2》）比起前作有明顯進步，背景畫面靚咗之餘光源特效等亦做得唔錯，如果上集嚇怕咗你不妨畀多次機會佢。基本模式方面包括有講述每名角色獨有古仔嘅故事模式，與平時對戰有所分別、透過不斷賺分去商店買新道具強化角色嘅QuestSurvival，以及任你調校鏡頭擺位拍張靚相嘅攝影模式等。尤其以Quest最為耐玩兼講心思，佢可以畀你逐步強化能力已經係延長耐玩性嘅上佳手段。至於新系統則有「裁」呢種扭轉劣勢嘅反擊手段，此外仲有用嚟取消基本必殺技嘅SuperCancel，當然亦有上集做得唔好、今次改番合理好多嘅連續駁招StylishArt，感覺上開始接近番2D版《拳皇》嘅玩法冇再咁亂嚟。
決戰MetalSlug勁爆笑
為咗令人有較深刻嘅感覺，開發人員特地喺《拳皇MI2》增設咗非常有心思嘅ExtraMisson，包括有破壞戰車等共4種競技項目，有啲似《街霸》年代拆車BonusGame咁款。縱使呢啲小遊戲同劇情無關，當睇到班格鬥家係咁𡁻啲死物又真係幾得意，事關真人打得多都會悶啦！另外網上對戰亦係今作一大賣點，不過並唔係每個香港玩家都能夠享用得到，一來你至少要有Modem或者用緊薄機有個LAN接口，二來又要搞專用嘅MMBB戶口，如果平時冇玩開上網版《MonsterHunter》就唔好嘥時間諗呢個Function咯。
阿金傑斯齊做隱人
自《餓狼》年代已經成為SNK經典角色嘅跆拳道高手阿金，以及歷來最屈機大佬、死極都死唔去嘅傑斯都係本作7大隱藏人物之一，再加上嚟自《餓狼MOW》嘅人氣女海盜Jenny同年老版Terry，唔通開發者特別偏好呢個殿堂級格鬥系列？而基本角色亦有唔少新面孔，好似「蝴蝶夫人」Luise、「四眼電腦忍者」七瀨同K'親密好友Kula等，喺今集都算係幾好用嘅角色。而且角色多咗之餘，仲可以揀平時難得一見嘅第２套衫，唔少都設計得相當搞嘢，玩慣2D版嘅老手睇到應該都會會心微笑。
限定版送動畫DVD
唔知大家有冇印象，先前《拳皇》公布過打算製作有番咁上下質素嘅原創動畫，𠵱家佢會隨《拳皇MI2》初回版限量附送，鍾意《拳皇》系列嘅Fans就千祈咪走雞。呢套《拳皇：AnotherDay》唔似CG片咁硬邦邦，全部共4集，畫質都算唔錯，再加上採用5.1環迴立體聲收錄，更設有英語配音版和字幕選擇，想欣賞日本聲優演出或者聽得明古仔講乜都唔難啦！
機種：PS2
廠商：SNKPLAYMORE
類型：FTG
人數：1-2人
發售日：發售中
價格：$420
查詢：DreamStore（25753285）
