劉德華雖然年年都唔畀面出席商台嘅叱咤樂壇頒獎禮，但近年佢同商台關係都有啲改善，好似舊年華仔都可以喺叱咤攞番個金曲獎，可能同佢呢幾年經常幫商台做廣播劇有啲關係。最近佢又答應幫商台做廣播劇《黃金少年》，不過今次就搵埋譚詠麟（阿倫）、莫文蔚同杜汶澤幫手客串。
似足《變種特攻》
今次呢個廣播劇嘅主角其實係森美同ILoveYouBoyz，華仔同杜汶澤喺個廣播劇係做異能人，但因為喺平凡人嘅社會好難立足，搞到要逃亡。而阿倫就破天荒喺個劇做奸角，飾演一個專針對異能人嘅大有錢佬，誓要趕絕華仔，聽落好鬼似《變種特攻》（X-Men）嘅古仔喎。
以譚校長今時今日嘅身份，竟然肯幫商台做廣播劇，仲要做反派，馮仁昭聽聞阿倫純粹係畀面商台嘅新紮助理總經理甘菁菁，以前佢兩個都係寶麗金同事，阿倫份人念舊，呢次擺明係撐老友。
