𠵱家係節瓜當造時節，我啲菜差唔多全部由新界嚟貨，好新鮮安全㗎。大陸啲菜周不時又話有農藥，唔入貨住喇！
節瓜又叫毛瓜，因為表皮上面生咗好多白色嘅毛。要揀靚節瓜，最緊要係要毛臣臣、墜手，咁至夠新鮮。節瓜喺廣東境內各地都有出產，好多人都話新會蓮塘鄉出產嘅最靚，其實新界出產嘅都相當唔錯。節瓜嘅瓜味清甜仲帶啲梨花香，無論用嚟煲湯做菜都清香美味。
驅暑防感冒
節瓜嘅效用同冬瓜好相似，不過冬瓜就比較寒涼，身體孱弱嘅人就唔好食咁多喇。節瓜就唔同喇，水氣最多，將節瓜、紅蘿蔔、花生、栗子、冬菇一齊煲湯，唔單止驅暑健脾，養顏潤膚，仲可以預防感冒㖭。加大頭菜落節瓜湯裏頭，仲可以解暑止渴㗎！