審計署署長鄧國斌針對港台，話港台管理混亂，不符「強政勵治」，於是好多人話佢自己將審計報告政治化，鄧署長把口叻過車仔領隊摩連奴，摩連奴輸親波就賴球證，鄧署長就賴翻譯，話翻譯有誤，將strongpublicgovernance譯為「強政勵治」係一時不察啫，如果早知道會引起批評，就刪咗呢幾個字都冇所謂。講咩，報告初稿審稿嗰陣，點解會諗唔到「強政勵治」係曾特首嘅政治語言呀？露咗底就無謂撐啦。嗱，各位讀翻譯系嘅同學注意，以後見到strongpublicgovernance呢三個字，唔好譯做「強政勵治」呀，鄧署長話唔啱嘅喎。
呢日碰到幾個電視台追訪民政事務局局長何志平，睇見佢哋孭住啲攝錄機，腳架都幾重噃。問佢哋：「有冇十九點三年攝製經驗呀？」幾位Camman初時為之愕然，後來明白咗，其中一位立即笑笑口回答：「做我哋呢行，有十九點三年經驗，都怕且要退休咯。」大編輯做過電視台，開過製作公司，對攝製節目有經驗，佢笑住講：「拍《城市論壇》，有幾多個鏡頭變化呀？影吓天空，影吓維園阿伯，大部份時間將鏡頭對實主持與五位講者，唔使玩花臣，攝影師有三五年經驗，乜都夠啦。」唔係喎，審計署話查到港台城市論壇攝製隊嘅平均年資係十二點九年，與外判合約規定十九點三年不符，當然捉正港台痛腳，但亦當然係吹毛求疵。你話有邊位專業人士、觀眾，睇得出《城市論壇》之攝影係出自一位十九點三年技師之手？或係十五年技師之手。睇得出，左丁山肯錫佢一啖。
有個提議畀審計署署長，曾特首去年為咗挽回政改方案，曾經緊急推出一個特首面向市民嘅電視演說。市民在電視見到特首面色灰白，表情緊張，背景暗，負責攝製嘅隊伍實在做得差到極，究竟由何人負責？用咗幾多錢？班攝製人員究竟有冇三年攝製經驗？審計署長開口埋口講衡工量值，敢唔敢查一查邊一位設計曾特首嘅電視形象，居然在緊要關頭，粗製濫造「特首電視演說」呀？