五一勞動假前夕，天色終於放晴，咁啱恒生銀行噚日拉大隊去馬鞍山郊野公園植樹，都算天公造美。噚日總共有超過150位恒生員工同家屬參加植樹，恒生副董事長柯清輝亦一家大細捧場，柯總一共有4位公子，噚日佢同柯太就帶咗其中兩位公子出嚟。
講開假期，前排復活節假碰啱人行開綠燈，畀QDII（合格境內機構投資者）政策出台，特首曾蔭權對於北大人嘅皇恩浩蕩，一方面多謝都嚟唔切，另一方面就𤷪𤺧班賓架掛住放假打golf，唔把握商機去敲周小川同劉明康道門。對於曾蔭權嘅「訓斥」，柯總唔單止唔介意，仲同特首解畫，佢話特首只係想叫金融界把握機會，「佢叫我哋去敲門亦都不過係講笑，皆因要『敲』都無從敲起，都未有details（詳細內容）。」
柯總仲語帶雙關話自己年紀大咗，鍾意打高爾夫球，以前就鍾意行山，回想佢74年開始參加外展訓練活動時，所有西貢嘅山都俾佢行勻，但之後就甚少行山，所以噚日行山表現麻麻。
傳真︰2623-9278
電郵︰[email protected]