香港狗舖一向信譽麻麻，周不時買到病狗亦不足為奇。今次的狗主Andrew因為一個廣告愛上長毛芝娃娃，但卻被狗舖呃過無數次才買到心頭好，氣結到拋下一句：「對香港狗舖已經失晒信心！」不過，這絕對影響唔到他對長毛芝娃娃嘅寵愛，有朝一日，他必定買間大屋再整間芝娃娃房畀佢哋歎世界。
記者：許維雅 攝影：周旭文
戀上長毛芝娃娃的開始
其實長毛芝娃娃在香港並不屬於太多人養的犬種，相比起松鼠、金毛尋回犬等，在狗店亦不常見有BB長毛芝娃娃出售。由細到大，屋企乜狗都養過的Andrew點解偏偏獨愛長毛芝娃娃呢？Andrew說：「以前經常喺日本做嘢，成日見到有個日本銀行廣告有隻長毛芝娃娃做主角，見到佢隻眼水汪汪咁真係好得意，於是就立心買一隻返嚟養。雖然一直諗咗好耐，但都冇行動，幾年前一次生日，有朋友知我鍾意就送咗一隻畀我做生日禮物，之後就開始瘋狂愛上。」
Mimi（女，01年11月21日出世）
外貌最正宗但亦最惡，只跟主人，其他人一律通咬。
Ocean（女，03年12月27日出世）
最斯文，體積最細，但性格最孤僻。
SnowBall（男，04年6月出世）
最活躍最為食，睇吓佢肥到一瞓低隻手都掂唔到地㖭。
GumGum（男，05年3月24日出世）
膽小但為食，是最精靈的一隻。
最痛心：香港狗舖呃完又呃
「第一隻朋友送給我的叫Pepsi，是經狗店訂的，又話澳洲訂回來必定純種必定靚，點知愈大愈變樣。」Andrew一向有行狗舖睇長毛芝娃娃的習慣，有一次見到Mimi好靚，狗舖原意買Mimi回來配種做生仔機器，點知久無所出，於是Andrew就求狗舖以$15,000讓他將Mimi接回家。後來有朋友好鍾意Pepsi，Andrew就轉送給朋友，但為了讓Mimi冇咁悶於是又買了SnowBall返來，點知又是一次被狗舖欺騙的經歷，同樣愈養愈走樣。最後一隻入屋的是GumGum，有一次行狗舖見到GumGum是他夢寐以求的長毛芝娃娃類型，於是又忍不住帶了牠回家。Andrew話：「其實唔止咁少經歷，但我真係對香港寵物店失晒信心，十次有九次買回來嘅狗唔係雜種就係有病，仲有好多大陸狗扮外地狗。每次買返嚟啲狗BB都醫成幾千蚊先醫好，更試過有狗BB買返嚟3日就死咗，真係好離譜。」
最開心：看着牠傳宗接代
長毛芝娃娃的性格比較獨特高傲，並不太熱衷於同陌生人玩，屬於文靜的狗種。不過，芝娃娃卻十分忠於主人，保護主人的警覺性極高，加上特別喜歡嗲主人，這亦是Andrew喜歡芝娃娃的原因。至於家裏出現的第5隻長毛芝娃娃Ocean，乃Mimi所出，亦是一個意外。事緣Andrew帶Mimi回寵物店沖涼，Mimi見回舊相好就一次搞掂咗。結果Mimi生咗3隻BB，一隻一出世就死咗，一隻養了幾日就死埋，最後只剩下Ocean。Andrew：「當時知道Mimi有咗都好興奮，到見佢生嗰一刻真係好開心，嗰種心情難以形容。不過可惜自己對於接生方面係初哥，最後只可以保住Ocean條命，實在有啲可惜。我暫時都唔會再買狗，等我換大啲間屋，整一間芝娃娃房先會再買。」Andrew的確是一個百分百長毛芝娃娃癡。
