羅可旋4年前一手創立時裝店Ztampz，可算是她人生的重要事，她熱愛時裝，亦深信香港人才眾多，希望有一天以時裝店賺得的利潤成立栽培年輕設計師的基金，實現父親對她的教誨——取之社會，用之社會。 撰文：梁錦雯
現年30歲的羅可旋（Victoria）人生中的愛情與麵包，可算是來得比別人早、比別人更清晰，26歲時，她已找到終身伴侶；至於事業，當大多數20出頭的小伙子還迷惘地為事業苦幹時，她憑着熱愛時裝的幹勁，4年前創立時裝店Ztampz。近年Victoria主攻法國時裝品牌breadnbutter，在港已有15間分店，每年營業額高達億元，前景樂觀。
沙士守業度難關
Victoria掌舵的Ztampz，可算是她事業路上的「牛油麵包」，與父親羅蜀凱的羅氏針織、家族擁有連鎖時裝品牌Bossini的巨型製衣王國相比，可說是小天地。但弱質纖纖的Victoria，對抗逆境時亦可以很有力量：「剛剛開舖半年，就經歷沙士，嗰時承受好大壓力，要蝕錢，守業半年，加長咗投資期。當個市好啲，業主就瘋狂加租100%，實在太黐線，根本冇可能做，要理性地離場。」
經歷了外患，Victoria又要面對內憂，她說：「因為Ztampz嘅市場已經飽和，加上貨源好唔穩定，有時靚，有時唔靚，船期唔係你控制，有時入咗一兩季，之後又俾人高價搶走個品牌，所以唔係自己嘅品牌，做得幾好都冇用。好似Joyce當年入Armani，幫人開晒舖都有十年八載，最後人哋都係自己做番。」
故此，Victoria更需要懂得看清形勢，亦摸清自己發展路線，她說：「3年前我就去巴黎，開拓走少女路線嘅法國時裝品牌，大路得嚟要有個性，要自己擁有一個品牌，設計、生產同管理都可以自己睇實。」
攞獨家品牌發圍
問Victoria是否參考了家族經營的Bossini的成功之道？她說：「羅氏針織係Gap最大嘅供應商，係全美最賺錢嘅公司，你哋話Gap大定Gucci大？一定係大路多過奢侈品牌。」
其實Victoria亦有自家的設計品牌：「我深信香港係有人才，只不過係冇人肯去做。啲設計師成日話香港冇市場，冇人惜才，其實係要栽培同畀機會佢哋，所以我希望公司賺到好好利潤嘅時候，想成立個栽培年輕設計師基金，可以畀佢哋去外國進修，因為人才始終係最重要，我好認同爹哋講過嘅取之社會，用之社會。」
Victoria作為創業新一代，問她有否向近在咫尺的父親取經，她說：「爹哋教我做人道理多過做生意，好似佢話修身、齊家、治國、平天下，教曉我哋唔好飄飄然，唔好做暴發戶，係終身受用嘅態度。至於做生意，佢有特別理論，要識得做蝕本生意，因為做生意要比人大膽，投資一定有蝕本期，唔可以心急，做得唔好，亦唔好死守，唔可以無限咁放大自己。」
創業宜膽大心細
問到創業心得，Victoria說：「明白到創業要膽大心細、要有決心，中途遇到唔如意嘅都唔好放棄。好多人覺得我冇包袱，唔做可以返去湊女，所以我嘅決心同承諾都好大，唔係玩玩吓。好似我二家姐（羅可欣）喺投資界原本有份好好嘅工，𠵱家嚟幫我手都笑住話將佢自己賭落我度。」
攝影：陳慧安
髮型：HermanLaiofO4No.8（馮氏大廈）
化妝：YvonneTangofHeadquarters
場地：breadnbutter（時代廣場）
部份圖片由羅可旋提供
