上星期日講格力狗華秀，本欄讀者反應好好，估唔到讀者之中，唔少係七八十歲嘅，一位女讀者J代男友母親寫嚟話，狼過華秀隻狗肯定並非出自澳門格力狗華秀，因呢位女士已年過七十，聽到狼過華秀隻狗呢句話之時，澳門重未有賽狗，據佢所知，華秀乃廣州一名惡霸，養兇狗嚇人，故有此俗語。
另一位女讀者L轉述佢爸爸之言，五十年代在廣州已經聽過「狼過華秀隻狗」，華秀係廣州城一個惡霸。一位八十多歲讀者親筆寫信嚟講：六十六年前佢睇過一段報道，講佛山有一位老闆名華秀，養有惡狗，兇狼異常，連會景巡遊出現一隻維妙維肖嘅紙紮老虎，隻狗都狼到撲出去咬爛，故「狼過華秀隻狗」一語，不脛而走。
一位元朗讀者張先生送來兩段報紙影印本，其一來自《晶報》（已關門二十餘年），該報專欄「通天曉」答讀者講「狼過華秀隻狗」嘅出處，呢位作者通天曉、（萍老、新七六九四八）記述，清末光緒年間廣東番禺縣有一位果農，名叫華秀，當時治安極差，汪洋大盜出沒，打家劫舍，果農養好多「圍口狗」作防衞之用，圍口狗即沙皮狗，純黃毛，或身上呈灰白色，頭部有黃毛，稱為「白狗黃頭身打印」，係最好名種狗，頭大口大，形如瓦筒，叫做「瓦筒嘴」。華秀飼養此類圍口狗，係最惡最狼一種，故人稱「狼過華秀隻狗」。
如此說來，華秀究竟係廣州惡霸還是番禺果農呢？讀者張另一段文稿出自《大公報》○一年五月二十六日，作者葉春生，所講嘅華秀，係廣州大惡霸，無惡不作，養惡狗咬人至死。
似乎多數人認為華秀係廣州一霸，專蝦貧農。《晶報》作者就話華秀係番禺果農，養惡狗只係為咗自衞。信邊個好？封神榜內有二郎神養哮天神犬，似乎唔係狼過華秀隻狗嘅出處。華秀故事至此講完，除非各位另有更好答案啦。