台灣靚女蔡依林次次出席活動都好大陣仗，噚日佢喺台北車站附近舉行新碟預購簽名會，吸引5,000幾名歌迷到場搶海報，佢就由4名赤膊猛男抬住出場，係威係勢，成個女王咁款。咁又係嘅，佢隻新碟預售3日，聲稱已經賣出10萬張，都唔到你唔服。可惜蔡依林繼之前嘅《看我72變》嘅封套造型同影相姿勢都被指抄襲濱崎步後，今次新歌《舞孃》MV又被指抄襲日本女星倖田來未嘅《Shakeit》，蔡依林所屬唱片公司高層就死口唔認，話蔡依林黑髮，倖田係金髮，根本唔同喎。