港股大時代，炒股要放要豪，永義（1218）超抵博。永義啱啱完成2供1伸手動作，現價（0.155元）相對供股後NAV0.56元，折讓72%，已夠吸引，但點止咁簡單？揸住亞洲聯盟（616）35.9%，佔亞聯市值凸章增值高達5.2億銀，永義每股NAV增值0.26元，實際NAV0.82元，現價折讓高達81%，令人垂涎三十尺。
基金可以pickupPE20、30倍、P/B3-4倍嘅股份話唔嫌貴，永義有咁大資產折讓墊底，翻騰動力斷估唔弱。上月26日推介位元堂（897），短短8個交易日，最高升幅近90%。位元堂除咗伸手馳名，資產折讓亦吸引到痹。開宗明義，港股大時代，唔理好股惡股，要睇點樣掘，永義NAV折讓收窄到43%，股價已經睇升兩倍到0.46元。
亞聯先排供股供0.40元，0.50元牛一輪，鏟高740%，升到4.175元，永義有排追。
合生係樣辦 麗豐博得過
星洲政府旗下淡馬錫，揸住嘅祖國房地產股，暫時得合生（754），嚟緊第二隻到麗豐（1125）。呢期淡馬錫旗下CapitaLand有意入股麗豐，等緊麗豐EGM通過。前邊合生由淡馬錫持倉曝光日到家陣升咗2.5倍，係絕佳樣辦，CapitaLand市值超過600億港銀，又係猛料企業。
現價買麗豐（0.36元），平過CapitaLand協議入股價0.4元。即係話，麗豐現價升14%，先到大孖沙起步位，博合生翻版，麗豐要現價翻兩番見1.4元。
錢雋