「金錢不是萬能，沒錢卻萬萬不能。」這句香港人經常掛在口邊的說話，正是夏雨的心聲。他早前首次踏足杜拜這個中東富豪大國，金錢創造出來的種種奇迹，令他眼界大開。只是，這些奇迹背後，原來滿載着異地人發達之夢，眼見他們刻苦耐勞地做一些當地人不願做的低下層工作，夏雨不勝感慨，貧與富，原來就在這一線之間。 撰文：戴彩煥
夏雨今次的杜拜之旅由頭等機艙開始，為了讓他親身體驗富豪滋味，無綫《向世界出發》不但安排他乘坐頭等機位，入住最新落成、參照阿拉伯古城設計的5星級朱美拉古城酒店（MadinatJumeirah）豪華套房，甚至入住恍如海市蜃樓的沙漠酒店，讓他在50℃高溫下享受衡溫私人泳池，對過慣小市民生活的夏雨而言，簡直是帝皇式享受。
人工島歎為觀止
興建在人工島的帆船酒店BurjAlArab是杜拜的指標，夏雨此行當然不會錯過到這間號稱全球最豪華的7星級酒店參觀，一開眼界，不過，最令他歎為觀止的，還是把沙漠變成綠洲，以及「棕櫚樹島」和「世界地圖島」這兩項大型建設工程。
夏雨說：「棕櫚樹島係以興建人工島嘅方法，喺海面興建3棵棕櫚樹形嘅人工島，再喺島群上興建連碼頭嘅超級豪宅，作價600萬至1,100萬港幣，聽講碧咸（DavidBeckham）都買咗間。不過，咁都未算誇張，杜拜仲有項叫『世界地圖島』工程，係以世界地圖為藍本，依照全球各國地形喺海上興建300個人工島，耗資超過1,090億港幣，都咪話唔豪！」
離鄉別井尋溫飽
在無綫安排下，夏雨參觀了杜拜豪宅的示範單位，以及拜訪坐擁10億身家的阿拉伯富豪布蘭迪的1萬3千呎行宮，令夏雨深深體會同人唔同命的滋味，他說：「我係典型嘅香港市民，幾十年嚟不外乎想供滿層樓，有個安樂窩，點知買咗層樓之後變負資產，真係一殼眼淚。我做過幾樣生意，喺內地搞地產、喺馬來西亞搞製作公司，又同朋友搞飲食生意，但冇次成功。」
其實，在杜拜不一定人人生活富裕，因為在100萬人口中，只有15萬阿拉伯裔人，其餘85萬人多來自伊朗、印度和巴基斯坦等地，一心來杜拜尋找發達之夢。在杜拜海灣1幢幢豪宅隔鄰搭乘水上的士的地方，夏雨便碰上1位來自巴基斯坦的水上的士船夫，對方為求家人溫飽，儲數萬港元回鄉做小生意，不惜離鄉別井跑到杜拜打工，每日由早做到晚，跟一些不大熟悉的人合租1個房間棲身。
看着這貧富懸殊，夏雨感慨地說：「錢真係好偉大，人原來可以利用錢去做一啲諗唔到嘅嘢，用錢去創造好多奇迹，好似沙漠酒店、帆船酒店，甚至成個島都可以起到，但我由最豪華睇到最低下層，見到好多好似伊拉克鄰近國家嘅人，運貨嚟呢度做買賣，做一啲好低下層嘅工作，覺得都幾發人深省，點解佢哋要做啲人哋唔肯做嘅工作？點解佢哋自己國家唔發奮圖強？」
寧做主席握大權
發達是每個香港人的夢想，也是夏雨的夢想，但是，怎樣才算發達？夏雨謂：「如果要我做到李嘉誠咁一定唔得，我唔係啲咁精明嘅人，如果要我做到李嘉誠咁，我不如做胡主席（胡錦濤），起碼地位高啲，權力大啲。在我嚟講，可以支持我嘅理想生活，做乜就做乜、想食乜就食乜，李嘉誠食四頭鮑，我又食到，咁就已經好發達。」夏雨訪杜拜的體驗，將在逢星期一至五晚無綫《向世界出發》內播出。
