香港地有唔少做嘢做到攤攤腰嘅打工仔，呢批人當中，一定包括經濟發展及勞工局常秘張建宗（圖）。張建宗呢排瘦身速度極快，效果比幫襯纖體公司好好多。原因？咪就係工作忙，忙到冇時間放假囉。張建宗話，佢過去8年累積放嘅假，都唔夠8個星期；過去1個月放嘅假，都只係得兩日半。
張建宗咁多年積落嚟差唔多有成280日假期，因為根本冇辦法放到假，佢惟有眼白白睇住啲假期俾老闆取消；如果以薪代假，呢條數都好襟計，原來成180萬！唔怪得做到成個人瘦晒啦！八方都好公平嘅，對基層員工係咁、對高官都係咁，都係覺得打工仔冇理由要為咗份工犧牲晒全部私人時間，話晒對個人健康都冇好處啦，唔知公務員事務局局長俞宗怡會唔會鬆手啲批吓假呢？
爆料熱線：29290000、27860099
報料傳真：26239278
報料電郵：[email protected]