呢排諗緊好唔好賣咗部舊車，走去買部福士GolfGTI玩吓嗰陣，朋友C突然拎住本最新嘅《AutoEXPRESS》上嚟我屋企，話Golf就嚟又轉款，叫我等多陣先喎！心諗唔係呀嘛，家陣賣緊個款唔係出咗好耐，咁快又轉款？後來睇清楚，報道只係話廠方仲研究緊新車各項配搭，預計車頭個Look會好似奧迪嘅新車咁，跟住仲會配埋經過改良嘅2.0公升引擎。至於部車幾時出，最快都要2009年，朋友C下次你都係睇清楚先同我講啦！
積架XK鬥保時捷911Carrera
次次睇親《AutoEXPRESS》，本書後半部都係玩名車大比拼，今期就梗係一樣啦！主角又係呢期好Hit嘅積架XK，仲有保時捷911Carrera同埋瑪莎拉蒂嘅GranSport。你俾我揀就肯定係XK，哈點知佢哋編輯部就揀911Carrera喎，原因係部車揸起上嚟好玩又夠靜。好在XK同佢都唔係相差好遠啫。
記者、攝影：鄭達基