林峯同鄭嘉穎兩位無綫小生，原來食嘢口味好一致，同樣鍾意食生蠔，仲幫襯埋同1間蠔店。林峯更稱得上係蠔精，一連兩晚擦蠔當飯食都冇相干。坊間有傳生蠔有壯陽功效，唔知佢哋兩個係咪成日忙拍劇，靠食生蠔嚟補吓呢？
多明星捧場
前幾日林峯同經理人和1名男性朋友，去咗中環蘇豪區OysterStationSnack&OysterBar開餐，見林峯大啖大啖將啲肥美嘅生蠔啜落肚，食到鬼咁滋味，唔知係咪未夠喉，第二日佢同雜誌影完相之後，即揸Benz跑載埋經理人去跑馬地嘅OysterIsland蠔店，開餐又擦過。
事隔幾日，鄭嘉穎同男性朋友又咁啱去咗林峯幫襯過嘅蘇豪區蠔店，頭尾坐咗個半鐘，埋單仲做埋柴可夫，揸MiniCooper載朋友離開。
講開又講，林峯同鄭嘉穎光顧嘅蘇豪區蠔店，雖然地方細細，但有超多明星客捧場，包括楊千嬅、鄭中基同容祖兒等，嗰度嘅生蠔每日由世界各地空運到港，種類繁多兼包保新鮮，價錢每隻由25蚊至60蚊不等。關仁知道林峯亦係熟客，但早排佢去內地拍攝《太極》，成個月都冇乜好嘢落肚，返到香港仲唔食番夠本呀？
Textby關仁
