唱歌要夠長氣、隻腳要長先至靚、拍拖要夠長情、夠長命就做乜都得啦……長，往往給人「嘩」一聲的驚喜。嚟銅鑼灣禮頓道同白沙道一帶的食肆，亦包你大開眼界。最具賣點的是剛於前日開張的一壽司，繼尖沙嘴店那個拍得住海洋公園的長40呎、價值百萬的魚缸後，銅鑼灣分店再下一城加碼到63呎長，堪稱亞洲最長的魚缸。其餘的有長歷史、長人龍、長營業時間、長出餸枱等餐廳，大家快啲嚟掃最「長」嘅街啦！
記者：葉靜君
攝影：何家亮、譚盈傑
模特兒：Bowie
長魚缸2千熱帶魚陪坐
大家有冇去過一壽司尖沙嘴舖呢？佢嘅40呎長魚缸已經係矚目之作，今次銅鑼灣新店的63呎長、價值180萬的魚缸更俾人「嘩！」一聲嘅反應，要知道63呎魚缸足有超過半個籃球場或一條保齡球道的長度，缸內有9噸水、養達800個珊瑚、2,000條熱帶魚，總重量超過12噸，堪稱為全亞洲最長的魚缸，正挑戰健力士世界紀錄。審查雖仍在進行中，但飽口福同時飽眼福，鬧巿中置身大自然水世界，犀利！長魚缸之外，必試這裏的1生1次系列，其採世上最珍貴的材料，每期都不斷加入新的食材，今期則有海膽同吞拿魚。
海膽玉子$46
呢款海膽玉子賣相夠晒吸引，用原隻蛋白造成泡沫，加入蟹子、冬菇、蘆笋及百合，蒸7分鐘再放入北海道海膽，海膽夏天當造，嚟緊食夠晒鮮甜。
Model試食：「呢度啲食物賣相好靚，我最鍾意海膽玉子，海鹽鋪底好似雪咁，好真。最緊要係入口好新鮮。」
紐約辛藍鮨吞拿魚$22
有一種紐約的風味，材料有帶辣的七味粉、蘿蔔茸及葱，由著名日本師傅創作，其曾於紐約開壽司店達40多年，連畢彼特都試過佢嘅壽司㗎！
新派鰻魚牛油果$22
平時食的壽司通常用紫菜包，今次外層則用蘿蔔皮代替紫菜，令鰻魚同牛油果無咁油膩，加入芝麻，更加香口。
日本柚子魚生TarTar$70
用有機的日本柚子，將柚子肉抽出，放入拖羅、劍魚、海膽、八爪魚、三文魚，魚生只帶少少柚子皮的香，目的是取其色、香多於味道。
1.一壽司
地址：禮頓道29號地下
電話：31880083
營業時間：12:00nn-12:00am
長龍馳名壽司晚巿例牌現蛇餅
IQ題：一間食肆乜嘢最長先係最威水？3、2、1，揭盅：當然係舖頭門口出面條長人龍啦！呢間峰壽司日日晚市門口出面最少都會有成10幾20人排隊，平日夜晚派籌250張，閒閒哋要等半個至1粒鐘。到周末及假日仲誇，派飛3百幾都要等成1、2個鐘㗎。條人龍咁長仲使問咩？梗係好食啦！
海鰻壽司$25
平時的鰻魚壽司「短切切」，根本食唔到鰻魚嘅味道，呢條燒海饅有成20厘米長，食落啖啖肉，爽呀！
燒鵝肝金箔壽司$35
先燒鵝肝，因為鵝肝本身無乜味，故塗上鰻魚汁，再加上京葱及金箔，吃下高貴而香口。
鱆紅魚壽司$20
由日本峰壽司總廚Tomo親自設計，壽司用上鱆紅魚加柚子，酸酸哋可以辟腥，加上胡椒鹽十分醒胃。
食客盧小姐：「覺得呢度啲壽司好好食，又成日出新款，就算要排隊都抵啦！」
2.峰壽司
地址：白沙道12號
電話：31882440
營業時間：11:30am-12:00am
長壽真係咸豐年代就有
講到最長歷史的餐館，大家公認的當然係以燒乳鴿馳名的太平館啦！其創立於1860年，講緊嘅係清朝咸豐十年，有成百幾年歷史。創辦人徐老高當年於廣州開業，秘製的燒乳鴿及煙鯧魚，聽講連周恩來同蔣介石都食過，厲害！及至1937年正式登陸香港，殺入上環，輾轉搬到灣仔，最後在1971年紮根銅鑼灣。現時已傳到第5代傳人徐錫安主理，除銅鑼灣店外，尚有油麻地、中環及尖沙嘴共4間分店。
太平館燒乳鴿$88
話晒都係百年老字號，呢個燒乳鴿同一般嘅好唔同，佢係用古法製，材料新鮮，即叫即炸，炸之前用香葉、雞骨、豬骨、紅蘿蔔、瑤柱及頭抽做的豉汁醃，之後再淋上自己調製的燒汁，夠晒入味。
煙鯧魚$140
用特別大條的深海鷹鯧魚，新鮮而肥美，魚質鮮甜，特別有口感。醃魚的材料為薑葱、紹酒、香葉、胡椒粉及頭抽，醃足5小時，然後用紅茶焗，出來的魚一定好香茶味。
食客羅小姐：「我食咗10幾年啦！因為呢度真係好好味，食極都唔厭，最鍾意佢嘅煙鯧魚。」
3.太平館
地址：白沙道6號
電話：25769161
營業時間：11:00am-12:00am
長枱21呎出餸枱惠食客
又唔係食迴轉壽司，莫講話普通食肆鮮見如「魚米家」般的長出餸枱，一般餐廳的出餸位更往往只有一個小口仔。「魚米家」特意安裝長達21呎的出餸枱，方便一次過可以出到幾十碗湯麵，咁啲客咪快啲有麵食咯！
魚腐米線$28
餐廳招牌米線，是用鯪魚肉加雞蛋煮成，魚腐出奇地大，仲要一碗之中有成7粒咁多，入口滑溜，抵食！
食客黃生：「我成日嚟食嘢，貪佢大件夾抵食，效率及服務態度都唔錯！」
長時間夜貓隊番杯
營業時間長可以話係尊重顧客的表現，呢間吧連餐廳係禮頓道開得最夜嘅食肆，營業至凌晨3點半，佢表面雖然係一間酒吧，但一樣有做午市、下午茶同晚巿，嚟食嘢嘅人都唔少，小食選擇算多，啱晒夜貓一族。
泰式燒豬頸肉$35
豬頸肉的肉質夠滑嫩，個泰式汁都做得唔錯㗎！
百萬金圓$58（HappyHour$38）
由Gin酒、甜威沫、紅糖水、蛋白及菠蘿汁調製成，顏色夠靚外，仲好香㖭。
5TheBarnBar&Restaurant
地址：禮頓道44-48號地下
電話：25043987
營業時間：11:30am-3:30am
