環新國際（502）3周前創出歷史新高，然後喺宣布末期業績後出現回吐，消化獲利貨後，升浪再展。此際買入，時間啱啱好，等隨時再創高。
環新係本港唯一可可豆貿易股，可可豆係製造朱古力原料。全球朱古力需求不斷增加，市場欣欣向榮，連雀巢發言人都預言，中國與印度未來4年，朱古力耗量會翻一番。朱古力主要原料既然係可可豆，可可豆貿易生意，當然唔憂做。
中間人得益大
全球可可豆最大3個生產國家，依序係象牙海岸、加納與印尼，其中印尼增產最佳。環新係印尼可可豆第3大出口商，直接向逾2000名印尼農場場主採購可可豆，賣畀歐洲最大5家可可豆進口商。其中3個大客，係Unicom、ICBT及Westermann，最近同環新達成協議，在08年10月前3年內，每年至少購買34000噸可可豆。
34000噸可可豆究竟係幾多？根據上周紐約商品期貨交易所每噸報價1521美元（11860港元）計算，3個大客每年至少會幫襯環新買4.03億港元嘅可可豆，已經佔環新去年全年營業額嘅57%。而且，生意唔係1年過，仲係3年。
環新由01年開始，直接向印尼農場場主採購可可豆，出手好爽，先預付貨款50%，所以深得農場場主信任，唔憂冇貨源之外，採購價亦低過其他行家，貨品質素亦有保證。兩邊關係搞得好，中間人環新得益大。
先畀50%貨款，唔係個個做得到。環新05年底，手上有現金高達3.73億元（每股現金值0.39元，佔股價高達55%）。印尼農場場主見環新出手慷慨，自然樂於將最高質素貨品賣畀環新。
05年度（12月年結），環新營業額7.12億元，增15%。純利1.12億元，增長22%，每股盈利0.125元，現價0.71元，往績PE不過5.7倍。
06年，朱古力需求穩定增長，可可豆貿易生意繼續理想。環新每股盈利增長20%至0.15元，冇乜難度，預測PE降到4.7倍更吸引水平。
講貿易股，龍頭當然係利豐（494），市值高達541億元，預期PE24.4倍。環新市值只係6.82億元，只係利豐1%多啲，當然冇得比，但PE只及利豐唔夠兩折，又係低得太離譜。
環新兩年半前上市，曾有計劃搞可可豆加工生意，後來因為印尼政局問題擱置，現在有意再搞。做埋加工生意，邊際利潤較貿易高好多，利潤更加較將錢擺銀行收息高出幾十倍。環新03年12月底上市初期，手上現金僅9600萬元，經兩年滾存及唔派息後，現時現金增至3.73億元，要搞可可豆加工生意，財力足以應付。做可可豆加工生意一旦落實，譬如話喺07年成事，盈利即刻大增。07年PE有可能得番3.5倍以下，吸引力爆晒出嚟。
長棍短棍兩棍準備
再睇P/B。05年底，環新股東資金4.45億元，以發行股本9.6億股計，每股賬面NAV0.46元，P/B僅1.5倍。貿易股P/B一般好高，利豐嘅11.6倍唔好講，其他細隻嘅貿易股，郁吓都講緊3倍以上，所以環新嘅1.5倍實在非常吸引。
短炒睇圖表。環新保歷加通道顯示，上周五股價由0.65元低位最高彈上0.72元，收0.71元，剛好由通道底部重越中軸位0.704元，而9RSI不過55.8。大升浪由今年2月中起步，每個小浪高點都比上次高，今次由上周二開始反彈，周五出現旗形突破，預料可升破上次0.79元高位。
買環新，做兩「棍」準備。短棍睇9RSI上到75，目標價0.91元。長棍睇06年PE上到9倍，目標價1.35元。
高彰坡