早前西九諮詢名單公布之後，身為全國政協委員及八和會館前主席的汪明荃對名單沒有粵劇界代表大表不滿，昨日她到港台接受訪問，揚言要看看特首曾蔭權對粵劇界有何幫助才考慮是否支持他連任。杜琪峯於商台接受訪問時指阿姐這句話很「惡聽」，更勸對方不要阻住地球轉，阿姐聽完再作出反擊。
昨日汪明荃及杜琪峯分別就西九諮詢名單一事發言，阿姐於港台節目《清談一點鐘》中繼續炮轟西九發展諮詢委員會名單中沒有粵劇界代表，並指粵劇發展委員會主席周振基以及劉千石不夠代表性，二人未能清楚粵劇界的難處，她激動地作出一個比喻並說：「周振基都係捐過50萬畀新光戲院，劉千石都係成日陪住白雪仙出入，我夠睇咗醫生幾十年啦、我又幫過癌病基金籌款、我又有捐過錢，咁唔通我咁就可以代表醫學界呀？」
籲成員盡多點力
阿姐又語重心長叫八和會館的成員盡一點力，她續說：「佢哋應該瞓醒啦，大學啲校長都應該出嚟講吓嘢啦，佢哋驚乜呀，政府係唔係要矮化粵劇界呀？政府成日都鍾意搵啲行外人lead住啲行內人，同埋點解話劇界又咁多代表呀？係咪我哋粵劇界唔可以同官員溝通？」
在節目中阿姐又表示就算曾特首再連任5年都不會處理好西九事件，主持人便問她會否支持特首連任時，她說：「我唔敢表態，暫時未考慮，睇吓佢做啲乜嘢畀大家睇，佢係咪重視本土文化，等佢加啲人入去西九先啦。」
阿姐又透露早前為新光戲院籌款，自己原本只是召集人，香港藝術發展局主席的馬逢國答應撥款200萬，至今仍未收到，捐款50萬的周振基又要求阿姐交出費用處理的單據，加上裝修費用又未繳清，故此阿姐惟有做中間人處理有關事件。問到阿姐粵劇界中人未列入西九名單，有何看法？她說：「冇辦法，我奈佢唔何，咁無賴。」
妙論李嘉誠六叔
另一邊廂於商台接受《成班嘩鬼嘈喧巴巴閉》訪問的香港藝術發展局電影及媒體藝術主席杜琪峯，則指摘阿姐的說話不當，更勸她發表完意見之後應收聲，否則會「阻住地球轉」，他說：「阿姐唔使咁大聲嗌，我哋都冇電影界嘅人喺入面啦，我覺得劉千石同周振基未必代表唔到粵劇界㗎，等人哋做咗嘢先啦，未上馬就叫人墮馬。李嘉誠夠唔識起樓，佢咪起得樓最多，六叔（邵逸夫）都未拍過戲啦，佢又做得好好，人人都話要加代表，小販又話加，咪成幾千人，到時咪要去大球場開會。」
對於阿姐表示會否支持特首連任，要視乎對方有沒有為本土文化盡力，杜琪峯說：「作為一個政協咁講幾惡聽呀，兩件事都扯唔埋，原來特首得唔得係睇八和嗰一票嘅，佢視野太窄啦。」
最後杜琪峯更叫阿姐是時候收聲，他說：「阿姐唔好再講啦，唔係就阻住地球轉，叫佢好好拍劇，保重身體，呢啲嘢等啲後生去做，總之以和為貴啦。」
難掩不悅極勞氣
而阿姐昨日中午去到中環拍攝外景時，對於杜琪峯的批評，初時表現不太激動，不過後來面色變得不悅且勞氣地說：「我阻住地球轉咩？佢咁講就唔啱啦，係咪搵個唔係拍電影嘅人管佢都制呀？佢有佢意見，我清楚自己專業粵劇身份，社會係由唔同業界、聲音組成。」
最後向阿姐提到杜琪峯勸她應以和為貴，問她會否覺得對方為新片宣傳，她又說：「呢啲我唔發表意見，我開心佢出聲，起碼有人知乜嘢事。」
採訪、攝影：卓美絹、李珮洳
