由《金枝慾孽》幕前幕後班底攜手合作的無綫40集新劇《火舞黃沙》，將於明晚首播。《金》劇中妃嬪的宮廷鬥爭，將演變成黃土高原上閻、宋兩大家族的爭鬥，引發出段段兒女情仇之餘，更揭示昔日地位低微的女性，如何在封建社會中掙扎求存。另外，無綫首次遠赴黃土高原取景，究竟在拍攝上面對甚麼困難？為做當家而心狠手辣的焦玉蔡少芬，會否是如妃的寫照？而蔡少芬在拍攝過程中，又何以因為壓力淚灑片廠？且聽監製戚其義、編審周旭明和蔡少芬一一拆解！ 撰文：戴彩煥
監製戚其義：拍攝難度高
《火舞黃沙》是首部到大西北黃土高原拍攝外景的電視劇集，作為開荒牛，電視製作人自然要克服許多從未遇過的困難，監製戚其義說：「以前拍電視劇，有劇本有演員就夠，但𠵱家觀眾要求多咗，好講求質感，今次我哋咁遠去到寧夏同甘肅拍外景都係呢個原因。不過，大西北一帶有好多古迹，拍之前，我哋要簽好多批文，要遵守好多規矩，好似水洞溝咁，係舊石器時代人類遺址，受國家保護，每拍1個鏡頭都要好小心，唔可以整爛呢啲古迹。另外，大西北天氣變化好大，同1景點，由早到晚隨時會產生10幾種唔同景致，所以時間要捉得好緊。」
為令演員更有北方人特質，戚其義特要求他們做足準備工夫，他說：「喺黃土高原住嘅男人，個個都好健碩好黑，所以我要班男演員做gym同埋曬黑，好似陳豪咁，埋位前佢都特登匿埋一邊做pushup，谷行啲，佘詩曼同邵美琪就要學搓麵粉同打井。」
演員蔡少芬：劇本好難記
蔡少芬（Ada）在《火舞黃沙》中飾演宋家大當家焦玉，一個比她實際年齡成熟許多的角色，Ada說：「呢個角色要有當家嗰種氣燄，但有得嚟唔係咁外露嗰種，真係好難演。」
Ada表示，過往她讀完劇本後，總會稍作修改，以自己表達方式演繹，然而，今次《火》劇卻是「1個字也不能少」，Ada解釋說：「喺呢部劇裏面，少1隻字意思同語氣都會唔同晒，所以我花咗好多時間去記劇本。最深刻係有場戲講我識穿Maggie（邵美琪）做咗啲唔應該做嘅事，我講完之後Maggie要喊出嚟，點知我一去到嗰個位就kick住，愈急就愈講唔到。嗰次明明自己唔好，連累Maggie白白喊咗好多次，我猛同Maggiesaysorry，點知佢反過嚟安慰我話：『冇事㗎，下次再嚟過！』佢咁講，我即刻忍唔住喊出嚟。」
編審周旭明：焦玉似如妃
由《金枝慾孽》後宮妃嬪明爭暗鬥，到今次《火舞黃沙》兩大家族恩怨仇恨，都是圍繞着1個鬥字，某程度上，兩劇似乎有點相似。身為兩劇編審的周旭明亦認同，在硬線編排上，兩部劇有點近似，但在劇本處理上，兩者卻有很大分別，周旭明說：「宮廷裏面，個個講說話都好小心，太直接嘅話會好危險，所以佢哋嘅對白會有骨得嚟比較轉彎抹角，唔係咁明刀明槍，但《火舞黃沙》就直接好多，因為大西北嘅人說話較率直。」
蔡少芬在《火》劇中飾演的宋族當家焦玉，為保親生子前途而不擇手段，跟《金》劇中一心希望誕下王子力保寵妃地位的如妃處境亦十分相似，莫非焦玉是如妃的寫照？對此周旭明說：「位置上，如妃同焦玉係相近，但深入啲去睇，兩個角色其實好唔同，Ada係環境迫使佢咁做，佢為力保個仔嘅前途，當自己係1件工具，隨時可以犧牲，但如妃唔同，如妃係好enjoy佢嘅地位同權力，佢想生仔，無非係作為佢生存嘅工具，比較起上嚟，Ada嘅角色係貼近現代人嘅價值觀。」
復仇失摯愛
陝北黃土高原上，宋姓祖先因有恩於閻家，獲閻家族長下令善待，自此宋家幾代也依附閻家，直至閻萬曦當上族長，立志驅趕宋家。宋東昇與閻家寡婦相戀被揭破，要受點天燈刑罰，東昇雖僥倖存活，但被逐出閻家，並遇上家春分，後以為父奔喪為由回鄉，向萬曦報復，利用他與宋家族長之子東陽的兄弟情，扶東陽做宋族當家，但東陽二娘、宋族當家焦玉為保親子東曉前途，力阻東陽上位。東陽娶春分為妾，東昇始知春分是昔日悔婚妻子，對春分深感歉意，暗種情根。後東曉意外身亡，東陽得以掌權，跟萬曦對抗，最後東昇擊倒閻家。其時本娶了計明鳳為妻的萬曦，與焦玉互生情愫，而2人的相遇，原來是東昇真正復仇大計，要他體驗情難自控之苦。後萬曦與焦玉相戀被揭破，要受點天燈，春分以為是東昇所為而痛斥之，2人感情破裂，東昇始發現復仇大計令自己再次失去摯愛，悔不當初。
