現年57歲嘅歌神許冠傑（Sam）前年復出，先後喺紅館開咗44場演唱會，之後再去東南亞同美加等地做巡迴演出，估計收入勁達4千萬，確係非常和味，唔怪得早排會再次入紙紅館，打算出年開騷，趁60大壽前搶錢。
Sam就搏命𢱑銀，但佢兩位公子就賦閒度日，大仔許懷欣都有掂吓唱片嘢，之但係細仔懷谷就真係無業一族。
露台曬太陽
早幾日關仁去開康樂園探朋友，就見到肥肥白白嘅懷谷企喺老竇喺7年前購入嘅3千呎獨立屋露台曬太陽，當時佢着住件印有日本生啤牌子嘅T恤，瞇晒眼倚喺欄邊四圍look，又點吓菲傭喺露台執呢樣執嗰樣，自己又行吓企吓，跟住就縮番入屋歎冷氣。
而懷谷仲將佢個人名下價值逾13萬嘅豐田私家車泊喺屋企樓下，陪佢一齊曬太陽，其實嗰架車落地只得4個零月，望埋勁新淨，睇嚟佢都係要嚟擺多過揸㗎喇。話時話吖，老竇搵錢仔享福，都算係歌神父子寫照喇啩？
Textby關仁
