世界盃足球賽喺6月同7月會進入大直路，全球波迷都會日以繼夜咁追睇，商場大業主已經準備搞活動，迎接呢個全世界球壇盛事，希望化危機為商機。
好似新地主力催谷嘅觀塘apm商場，就會喺場內安裝超大電視屏幕，開到深夜，俾波迷睇足全場，又請評述員講波；更會將商場中央變身做足球場，俾人踢番兩腳。
信和嘅旗艦商場大角嘴奧海城商場，都一樣大打球迷主意，做法都係有得睇直播，有人講波同場內有真球場畀人玩。
九龍倉嘅銅鑼灣時代廣場、尖沙嘴海港城同鑽石山荷里活廣場，就以PlayStation嚟吸引波迷同機迷。總之，凡場都要有電視，唔直播都錄播，否則唔使旨意有人行。
由於上屆世界盃期間，全城商業活動近乎死寂，所以今年啲商場大業主都好醒目，嗱嗱聲做好準備，等班波迷自動上門，場內嘅飲食業就肯定迫爆。
電郵地址：[email protected]